Një 64-vjeçar i shpallur në kërkim ndërkombëtar nga autoritetet italiane është arrestuar në Vlorë, me qëllim ekstradimin drejt Italisë. Ai ishte dënuar me 4 vite burg nga Gjykata e Apelit e Peruxhias për veprën penale “Marrëdhënia seksuale me dhunë”.
Policia e Vlorës njofton se arrestimi u krye në lagjen “Hajro Çakërri”, në kuadër të operacionit të koduar “Strike 8”. I arrestuari, me inicialet A. B., 64 vjeç dhe banues në Tiranë, ishte shpallur në kërkim ndërkombëtar nga Interpol Roma.
Operacioni u organizua nga Seksioni për Mbështetjen Operacionale të Hetimit, pas informacioneve të siguruara në rrugë operative për vendndodhjen e tij.
Ndërkohë, Interpol Tirana, në bashkëpunim me homologët italianë, vijon procedurat për ekstradimin e 64-vjeçarit drejt Italisë, ku duhet të vuajë dënimin.
