Pas raportimeve se i dyshuari për plagosjen e dy personave në Shtërpcë është pjesëtar i Forcës së Sigurisë së Kosovës, ka reaguar ministri i Mbrojtjes së Kosovës, Armend Mehaj.

Teksa e ka konfirmuar këtë, Mehaj ka thënë se me rastin janë duke u marrë organet e sigurisë dhe drejtësisë.

“Do të trajtohet edhe sipas rregulloreve dhe ligjeve që kemi në fuqi në Ministrinë e Mbrojtjes dhe Forcës së Sigurisë”, ka shkruar ai në Facebook.

Më tej, ministri ka shprehur keqardhjen më të thellë për rastin.
“Të plagosurve, u uroj shërim sa më të shpejtë. Raste si kjo janë të izoluara, por si të tilla nuk guxojnë të ndodhin. Ministria e Mbrojtës dhe Forca e Sigurisë së Kosovës mbeten të përkushtuar për t’i shërbyer qytetarëve tanë pa dallim”, ka përfunduar Mehaj.

Dy persona, njëri 11-vjeçar e tjetri 31-vjeçar, janë plagosur këtë të premte në fshatin Drajkovc të Shtërpcës, pasi në drejtim të tyre është shtënë me armë zjarri nga një automjet në lëvizje.

I dyshuari për këtë rast, A.K., i moshës 33-vjeçare, është identifikuar dhe arrestuar nga Policia e Kosovës.