Gjendet trupi i pajetë i një 34-vjeçari nga Vlora, që rezultonte i zhdukur disa ditë më parë.
Gazetari Enrik Mehmeti raporton për “BalkanWeb” se bëhet fjalë për Martin Selenin, i cili dyshohet se ka konsumuar lëndë narkotike.
Nga të dhënat e deritanishme të policisë, ka dyshime se i riu ka ndërruar jetë nga mbidoza. Policia po vijon hetimet për zbardhjen e shkaqeve të ngjarjes.
NJOFTIMI I POLICISE
Rreth orës 17:50, në lagjen “1 Maji”, Vlorë, në një banesë të braktisur është gjetur një kufomë e seksit mashkull, gjysmë i dekompozuar.
Nga këqyrja paraprake në trupin e pajetë nuk janë konstatuar shenja dhune apo dëmtime të tjera.
Nisur nga verifikimet e kryera, Policia ka bërë identifikimin e kufomës që i përket shtetasit M. S., 34 vjeç, banues në Vlorë, i cili është larguar nga banesa në datën 4 Maj 2020.
Grupi hetimor ndodhet në vendngjarje dhe po punon për sqarimin e rrethanave të humbjes së jetës së 34-vjeçarit, ku paraprakisht dyshohet si pasojë e konsumit të lëndëve narkotike.
(BalkanWeb)
