Dinamo fitoi dje Kupën e Shqipërisë ndaj Egnatias, ndërsa nuk ka kohë për të pushuar. Pasnesër, pikërisht më 16 maj, do të luhet sfida e javës së parë në Final Four ndaj Vllaznisë.

Dinamovitët e drejtuar nga trajneri Ilir Daja, do të dalin zyrtarisht nga gara për titull kampion nëse nuk fitojnë. Për këtë, sfida në stadiumin “Air Albania” është mjaft delikate.

Disavantazhi më i madh për ekipin e Dinamos është se mungon koha, për ta përgatitur si duhet sfidën me Vllazninë. Ilir Daja ankohej më parë në këtë sezon, për mënyrën si ndërtohet kalendari.

Trajneri i Dinamos deklaronte më 27 prill, pas humbjes me Flamurtarin: “Para katër ditësh luajtëm gjysmëfinalen, jo për këtë vit po dhe këto që bëjnë kalendarin duhet ta kenë mënyrën e shpërndarjes. Tani që luajnë të gjithë për objektiva, ngjeshen çdo 3-4 ditë, mund të bëhet më përpara”.