Qeveria e Jemenit, e njohur ndërkombëtarisht, i ka kërkuar Iranit të ndalë furnizimin me armë të rebelëve Houthi, të tërheqë këshilltarët e tij ushtarakë dhe të ndërpresë ndërhyrjen në punët e brendshme të vendit.

Në një deklaratë të Ministrisë së Jashtme, të raportuar nga media “Iran International”, Teherani akuzohet se nuk kufizohet vetëm në mbështetjen e grupit Houthi, por merr pjesë drejtpërdrejt edhe në planifikimin dhe drejtimin e operacioneve të tij.

Sipas autoriteteve jemenase, janë identifikuar 21 ekspertë të huaj që bashkëpunojnë me Houthi-t. Prej tyre, 14 dyshohet se janë pjesëtarë të Gardës Revolucionare Islamike të Iranit, ndërsa shtatë të tjerë janë militantë të Hezbollahut.

Ministria e Jashtme e Jemenit pretendon se aktivitetet e tyre përfshijnë komandimin dhe kontrollin e operacioneve, përdorimin e raketave balistike dhe dronëve, luftën elektronike, kontrabandën e armëve, si dhe koordinimin e sulmeve detare. Këto aktivitete përfshijnë, sipas deklaratës, edhe përzgjedhjen e anijeve tregtare që do të shënjestrohen.

Qeveria jemenase akuzon gjithashtu Iranin se ka lehtësuar sulmet e Houthi-ve ndaj Arabisë Saudite, transportit detar tregtar dhe lundrimit në Detin e Kuq dhe në Ngushticën Bab al-Mandab.