Presidenti meksikan Andres Manuel Lopez Obrador reagoi ndaj një njoftimi të Departamentit të Shtetit dhe akuzoi Shtetet e Bashkuara se ndërhyjnë në punët e brendshme të vendit të tij.
“Siç është zakoni i tyre i keq, ata gjithmonë përzihen në punët që nuk u takojnë”, tha presidenti meksikan në konferencën e tij ditore për shtyp. Në të njëjtën kohë, ai njoftoi gjithashtu një investim nga prodhuesi i makinave elektrike Tesla në Meksikë.
“Ka më shumë demokraci në Meksikë sesa në SHBA,” vazhdoi ai, duke i bërë thirrje Uashingtonit të adresojë çfarë po ndodh në Peru. López Obrador akuzon SHBA-në për mbështetjen e grushteve të shtetit që shkelën liritë dhe demokracinë në atë vend pasi parlamenti i Perusë rrëzoi Presidentin Pedro Castillo.
“Në Meksikë, ne jemi dëshmitarë të një debati të madh publik rreth reformave zgjedhore që po sfidojnë pavarësinë e institucioneve zgjedhore dhe gjyqësore,” tha të dielën Zëvendës Sekretari i Shtetit i SHBA për Amerikën Latine, Brian Nichols.
Shumë meksikanë protestuan të dielën që lamë pas kundër reformës që do të reduktojë buxhetin dhe stafin e Institutit Kombëtar të Zgjedhjeve (INE). Reforma tashmë është miratuar nga Senati dhe kërcënon pavarësinë e INE-së, pothuajse një vit para zgjedhjeve presidenciale të cilat do të mbahen në 2024.
Në njoftimin e Departamentit të Shtetit thuhet se SHBA mbështet institucionet elektorale “të pavarura”.
(BalkanWeb)
