Të ftohim më zgjuar, duke konsumuar më pak energji dhe me më pak ndikim në klimë. Mesazhi i Ditës Botërore të Ozonit u kthye në veprim konkret në Shkollën Profesionale “Karl Gega”, ku, me mbështetjen e UNIDO-s dhe në bashkëpunim me Njësinë Kombëtare të Ozonit, u vu në funksion pompa e parë e avancuar e nxehtësisë me R290 në një shkollë shqiptare.

Teknologjia e re kombinon efikasitetin e lartë energjetik me R290 (propan), një gaz ftohës natyral me Potencial të Ngrohjes Globale (GWP) vetëm 3. Projekti demonstron në praktikë se kalimi drejt gazeve ftohëse me ndikim shumë të ulët në klimë mund të shkojë paralelisht me përdorimin më efikas të energjisë.
Për nxënësit e drejtimit Termohidraulikë, projekti është edhe një laborator praktik: ata ndoqën nga afër instalimin dhe tashmë mund të mësojnë drejtpërdrejt mbi teknologjinë që do të përdorin profesionistët e së ardhmes.

Me sistemin tashmë në funksion, “Karl Gega” bëhet modeli i parë demonstrues në një shkollë shqiptare për teknologjitë me GWP të ulët, një përvojë që mund të shërbejë për zgjerimin e tyre në shkolla dhe ndërtesa të tjera publike.