Qyteti i Pekinit do të instalojë mekanizma për njohjen faciale në metronë e kryeqytetit kinez duke lehtësuar kalimin e udhëtarëve të padyshuar, njoftoi shtypi zyrtar.
Në orët e pikut, aksesi në bord mund të marrë shumë minuta në metronë e kryeqytetit, ku të gjitha stacionet janë të pajisura me pika kontrolli ku kalimi është i detyrueshëm.
“Për të thjeshtuar aksesin e pasagjerëve, rrjeti urban do të vendosë kamera për njohjen faciale që detektojnë fytyrat e udhëtarëve dhe ndarjen e tyre në drejtime ndryshme”, theksoi drejtori i qendrës së menaxhimit të trafikut të metrosë, Zhan Minghui.
“Ky projekt synon vendosjen e një sistemi për reputacionin e pasagjerëve, në të cilin udhëtarët që bëjnë pjesë në një listë të bardhë do të mund të përfitojnë masa më të reduktuara kontrolli”, theksoi një e përditshme e Pekinit.
Kina ka filluar këto vitet e fundit të vendosë sisteme të ndryshme për “reputacionin social” që japin pikë për qytetarët “e mirë” por, mund të pengojnë qytetarët e tjerë të marrin trenin, avionin ose të kryejnë një rezervim hoteli.
Metroja e Pekinit kishte njoftuar në muajin maj se kishte filluar të hiqte pikë për udhëtarët që hanin në ambientet e brendshme të metrosë.//ATSH