Në ndeshjen, e cila u zhvillua para disa ditësh në qytetin e Mainz-it, klubi i futbollit FC Cosmos shënoi suksesin më të madh që nga themelimi i tij në vitin 2007. Pas një pune dhe angazhimi të palodhur, kozmonautët fituan 1-0 në lojën shumë të rëndësishme para mbi një mijë spektatorë në TuS Marienborn.
Kjo fitore do të thotë gjithashtu ngritje më lartë në Oberliga (Liga e pestë). Klubi i futbollit FC Cosmos u themelua në vitin 2007. Ndërsa, nga viti 2019 klubi menaxhohet nga biznesmeni i njohur shqiptar, afaristi nga Kosova i pasionuar pas lojës magjike të futbollit, i cili jeton dhe vepron ne Koblenz, Remo Rashica, dhe nën kryesinë e përbërë nga Skënder Xhakaliu (president), Anil Büru (zevendespresident), Thomas Wunderlich (kryesia e sportit).
Njëherazi, ky ishte triumfi i parë i ndonjë skuadre gjermane i udhëhequr nga një biznesmen vizionar nga Kosova në grupet e një kompeticioni të tillë. “Jemi të gjithë jashtëzakonisht të lumtur për këtë sukses“, ka deklaruar presidenti i skuadrës Skënder Xhakaliu.
Gjashtëmbëdhjetë vjet ndërmjet 2007 dhe 2023, FC Cosmos përparoi nga liga amatore në Oberliga (divizioni i pestë), me synim të ngritjes në Bundesliga 2 (divizioni apo liga e dytë). Rashica është deklaruar tejet i emocionuar dhe i lumtur me këtë ngritje në Oberliga.
Pas një pune dhe angazhimi maksimal, Rashica u shpreh i bindur se skuadra e tij do t’ia dal mbanë dhe pas disa vitesh të luajë në Bundesligë. Rashica po ashtu përfitoi nga rasti që të shprehë mirënjohjen dhe falënderimin e tij të përzemërt për sponsorët dhe afaristët e shumtë gjerman për përkrahjen dhe mbështetjen e tyre. Klubi i futbollit FC Cosmos ka arritur që t’i kalojë dy liga në afat rekord që në futbollin gjerman është një ”sensacion“ i pa arritur deri më tani. Me këtë ngritje në ligën e pestë gjermane tani hapen edhe shumë mundësi dhe perspektiva të reja edhe për lojtarë të talentuar nga Kosova dhe rajoni.
FC Cosmos tani e tutje do të zhvillojë ndeshjet në stadiumin e qytetit Oberëerth me një kapacitet rreth dhjetë mijë spektatorë. Stadiumi ka edhe hapësirën e VIP-së dhe për media. Ndërsa, klubi organizoi evenimentin e tretë me radhë “Cosmos Connected Club“ në të cilën morën pjesë shumë afaristë, sponsorë, përfaqësues të federatës së futbollit, përfaqësues të federatës së golfit, sportistë dhe miq të shumtë.
Me këtë rast, kryesia e klubit falënderoi përzemërsisht të gjithë të pranishmit për përkrahjen e tyre të vazhdueshme dhe bashkëpunimin përgjatë viteve.
(BalkanWeb)
