Presidenti rus Vladimir Putin dhe Princi i Kurorës të Saudisë, Mohammed bin Salman Al Saud kanë bashkëbiseduar përmes një telefonate, tha Kremlini në një deklaratë.
“U diskutua për zhvillimin e mëtejshëm të bashkëpunimit dypalësh në fushën politike, tregtare, ekonomike dhe energjetike, si dhe bashkëpunimin në kuadër të OPEC+, për të garantuar stabilitetin e tregut botëror të naftës”, thuhet në deklaratë.
Kujtojmë që më 1 shkurt do të jetë takimi i radhës për OPEC+.
Në tetor 2022, OPEC+ ra dakord të ulte prodhimin me dy milionë fuçi në ditë, dy herë më shumë se sa kishin parashikuar analistët, pavarësisht një fushate presioni intensiv nga Shtetet e Bashkuara, të cilat kishin paralajmëruar aleatët arabë se një veprim i tillë do të rriste çmimet dhe do të ndihmonte presidentin rus. Nëpërmjet kësaj mënyrë, Vladimir Putin po vazhdon të financojë luftën e tij në Ukrainë.
Arabia Saudite mbrojti vendimin pasi çmimet e naftës u tërhoqën në mënyrë të vazhdueshme.
Anëtarët e OPEC -ut furnizojnë kolektivisht rreth 37% të prodhimit botëror të naftës së papërpunuar. Së bashku, anëtarët e OPEC-ut kontrollojnë rreth 80% të rezervave totale të provuara të papërpunuara në botë.
(BalkanWeb)
