Policia italiane ka zgjeruar flotën e saj me një automjet të pazakontë për një forcë policore: **Lamborghini Temerario, me një fuqi prej 920 kuajsh.

Pavarësisht performancës së jashtëzakonshme, makina nuk do të përdoret për ndjekje të mjeteve me shpejtësi të lartë në autostrada. Ajo do të ketë një tjetër mision, shumë më të rëndësishëm: **transportin urgjent të organeve për transplantim dhe materialeve mjekësore.

Automjeti i ri u prezantua në ambientet e Lamborghinit, në një ceremoni ku morën pjesë edhe ministri i Brendshëm italian, Matteo Piantedosi, si dhe drejtues të kompanisë.

Bashkëpunimi mes Lamborghini-t dhe Policisë italiane nuk është i ri. Ai daton që prej vitit 2004, kur në shërbim u vendos një Lamborghini Gallardo. Që atëherë, automjetet e kësaj marke janë përdorur në raste të transportit urgjent të organeve, ku koha është një faktor vendimtar për pacientët që presin transplantin.

Temerario e re, falë fuqisë së saj dhe karakteristikave teknike, është përshtatur për këtë qëllim të veçantë. Për Policinë italiane, supermakina nuk është thjesht një mjet luksi, por një automjet që mund të shkurtojë ndjeshëm kohën e transportit në situata kritike.