Autoritetet meksikane kanë sekuestruar 24,400 litra metamfetaminë të lëngshme , sekuestrimi i dytë më i madh i drogës në historinë e vendit, tha Ministria e Sigurisë dhe Mbrojtjes Civile në një deklaratë .
Substanca u gjet në një zonë ku vepron karteli i fuqishëm Sinaloa, i themeluar nga famëkeqi Joaquin “El Chapo” Guzman, tha ministria në një deklaratë, duke shtuar se 2.1 ton kokainë u sekuestruan gjithashtu në dy shtete të tjera.
Autoritetet meksikane kanë rritur sekuestrimin dhe arrestimet e drogës që kur Donald Trump u rikthye në presidencën e SHBA-së. Republikani po ushtron presion mbi qeverinë e homologes së tij meksikane Claudia Sheinbaum për të frenuar trafikun e drogës përtej kufirit midis dy vendeve.
Sasia e metamfetaminës u gjet në Los Mochis, në shtetin e Sinaloa veriperëndim, brenda dhjetëra fuçive dhe kontejnerëve të paketuar. Një burrë u arrestua gjatë operacionit, shtoi Ministri i Sigurisë Omar Garcia Harfus.
Përleshjet midis fraksioneve rivale të kartelit Sinaloa kanë qenë të ashpra në shtetin me të njëjtin emër që nga viti 2024, duke lënë qindra të vdekur dhe të zhdukur.
Uashingtoni akuzon kartelin Sinaloa për trafikimin e fentanilit në Shtetet e Bashkuara, ku opioidi sintetik ka shkaktuar dhjetëra mijëra vdekje nga mbidoza çdo vit në vitet e fundit, duke nxitur tensione në marrëdhëniet dypalëshe me Meksikën.
Themeluesi dhe deri para pak vitesh udhëheqësi i këtij karteli, Joaquín Guzmán, i njohur edhe si “El Chapo”, aktualisht po vuan një dënim me burgim të përjetshëm në Shtetet e Bashkuara.
