Paul Mackenzie, udhëheqësi i sektit fetar që qëndron pas një prej masakrave më të rënda në Kenia, është dënuar me 200 vite burg për vrasjen e 191 personave, mes tyre 190 fëmijë. Vendimi u shpall të premten, më 6 nëntor, nga autoritetet gjyqësore keniane, pas një procesi që tronditi vendin dhe tërhoqi vëmendjen ndërkombëtare.

Mackenzie, themelues i Kishës Ndërkombëtare të Lajmit të Mirë, kishte bindur ndjekësit e tij të braktisnin shtëpitë dhe të shpërnguleshin në pyllin Shakahola, në lindje të Kenias. Ai u premtonte se përmes agjërimit në pyll do të afroheshin me Zotin dhe do të përgatiteshin për të hyrë në parajsë. Në vend të kësaj, qindra njerëz humbën jetën nga uria.

Sipas vendimit të gjykatës, Mackenzie u shpall fajtor muajin e kaluar për 191 vrasje të kryera gjatë periudhës janar 2021 – shtator 2023. Krahas tij, u dënuan edhe 28 persona të tjerë, të cilët ishin bashkë të pandehur në këtë çështje.

Prokuroria kishte kërkuar dënimin me vdekje për Mackenzie-n dhe burgim të përjetshëm për bashkëpunëtorët e tij. Megjithëse legjislacioni kenian e parashikon dënimin kapital, në vend nuk është ekzekutuar asnjë person që prej vitit 1987. Ndërkohë, avokati i Mackenzie-t ka deklaruar se do ta apelojë vendimin.

Çështja e tij nuk përfundon me këtë dënim, pasi ai përballet edhe me akuza të veçanta për vrasje dhe terrorizëm, të cilat i mohon.

Masakra e pyllit Shakahola u zbulua në vitin 2023, kur autoritetet nisën kërkimet në zonën ku ndodhej baza e sektit, pranë qytetit bregdetar të Malindit. Qindra trupa u zbuluan në varre masive, ndërsa hetimet zbardhën përmasat e tragjedisë.

Komisioni Kombëtar i të Drejtave të Njeriut në Kenia vlerësoi në vitin 2024 se numri i viktimave kishte arritur në 429. Një pjesë e tyre ende nuk janë gjetur.

Mackenzie u arrestua në prill të vitit 2023, pasi një organizatë për të drejtat e njeriut sinjalizoi autoritetet për atë që po ndodhte në pyll. Gjatë ndërhyrjes, disa ndjekës të sektit arritën të shpëtoheshin nga ferma prej 325 hektarësh ku zhvilloheshin aktivitetet e grupit.