Marko Beceki dhuroi një paraqitje të shkëlqyer të premten në para-kualifikueset e Çmimit të Madh të Aragonit. Piloti italian e mbylli sesionin në vendin e parë, duke vendosur edhe rekordin e ri të pistës me kohën 1’45”455.

Ai ishte vetëm 10 të mijtat e sekondës më i shpejtë se më i vogli i vëllezërve Markez, Aleksi, ndërsa Mark Markez u rendit i treti, vetëm 38 të mijtat pas Becekit. Në vendin e shtatë u klasifikua lideri i kampionatit botëror dhe njëkohësisht shoku i skuadrës së Becekit, Horge Martin. Ndërkohë, Peko Banjaja nuk shkoi më larg se vendi i 13-të. Në një fundjave ku Dukati po dominon në Aragon, me katër pilotë në pesë pozicionet e para, ishte Marko Beceki me Aprilian ai që arriti t’i linte të gjithë pas.

Italiani kryesoi para-kualifikueset, duke vendosur edhe rekordin e ri të pistës, 1’45”455, përpara Aleks dhe Mark Markezit. Ky i fundit u shfaq në formë të mirë, pavarësisht disa shqetësimeve në krah. Megjithatë, për korrektësi, duhet theksuar se piloti më i madh i vëllezërve Markez nuk e zhvilloi xhiron e fundit me gomë të re, duke preferuar të dilte në pistë me një gomë që ishte përdorur më parë. Në vendin e katërt u rendit Fabio Di Xhanantonio, me 299 të mijtat e sekondës vonesë, përpara Fermin Aldeguerit, i pesti me një diferencë prej 440 të mijtash. Më shumë vështirësi pati lideri i klasifikimit, Horge Martin, i cili e mbylli sesionin në vendin e shtatë, me 572 të mijtat pas kreut.

Megjithatë, piloti spanjoll bëri një hap të rëndësishëm përpara krahasuar me FP1, ku ishte renditur vetëm në vendin e 18-të. Vështirësitë vazhdojnë edhe për Banjajan. Piloti italian e përfundoi sesionin në vendin e 13-të, më shumë se një sekondë pas Becekit, çka do ta detyrojë të kalojë nga Q1 në kualifikimet e së shtunës për të siguruar një vend në Q2. Dhjetëshen e parë, dhe për rrjedhojë edhe kualifikimin e drejtpërdrejtë në Q2, e plotësojnë Raul Fernandez, Pedro Akosta, Franko Morbideli dhe Johan Zarko.

Për t’u veçuar ishte rikthim në pistë i Zarkos, pas tre muajsh mungesë, pas dëmtimit të rëndë që pësoi në Barcelonë. Për sa i përket axhendës, sot në orën 10:45 do të nisin kualifikueset, ndërsa në orën 14:55 Sprinti. Çmimi i Madh i Aragonit do të startojë të dielën në orën 14:00.

ARAGON/PARAKUALIFIKUESET

PILOTI                      KOHA

1 Marko Beceki          1:45.455

2 Aleks Markez           1:45.465

3 Mark Markez           1:45.493

4 Fabio Di Xhanantonio          1:45.754

5 Fermin Aldeger        1:45.895

6 Raul Fernandes        1:45.959

7 Horge Martin            1:46.027

8 Pedro Akosta            1:46.064

9 Franko Morbideli     1:46.218

10 Johan Zarko           1:46.298

11 Diogo Moreira        1:46.308

12 Luka Marini           1:46.376

13 Françesko Banjaja  1:46.487

14 Fabio Kuartararo    1:46.618

15 Joan Mir     1:46.623

16 Aleks Rins  1:46.704

17 Enea Bastianini      1:46.949

18 Bred Binder            1:47.009

19 Xhek Miller            1:47.093

20 Pol Espargaro         1:47.188

21 Toprak Razgatlioglu           1:47.357

22 Lorenco Savadori   1:47.709

BOTËRORI 2026

PILOTI                      PIKËT

1 Horge Martin            240

2 Marko Bexeki          209

3 Ai Ogura                  203

4 Mark Markez           200

5 Fabio Di Xhanantonio 199

6 Raul Fernandez 184

7 Pedro Akosta            163

8 Françesko Banaja     143

9 Aleks Markez           106

10 Luka Marini           86

11 Fermin Aldeger      76

12 Enea Bastianini      76

13 Brad Binder            72

14 Fabio Kuartararo    59

15 Diogo Moreira        54

16 Franko Morbideli   53

17 Zohan Zarko          34

18 Joan Mir     29

19 Xhek Miller            22

20 Aleks Rins  21

21 Toprak Razgatlioglu           13

22 Maverik Vinjales    10

23 Iker Lekuona          9

24 Augusto Fernandez            5

25 Pol Espargaro         2