Kryetari i Rezervës Federale të SHBA-së, Kevin Warsh, u zotua se Banka Qendrore do të vazhdojë luftën kundër inflacionit, gjatë dëshmisë së tij të parë në Kongres si drejtues i Fed-it.

Duke folur përpara Komitetit të Shërbimeve Financiare të Dhomës së Përfaqësuesve, Warsh theksoi se inflacioni i lartë ka krijuar një barrë të rëndë për familjet dhe bizneset amerikane.

“Anëtarët e Komitetit Federal të Tregut të Hapur nuk kanë tolerancë për inflacionin vazhdimisht të lartë. Ne jemi të vendosur të rikthejmë stabilitetin e çmimeve”, deklaroi ai.

Komentet e tij erdhën pasi të dhënat e publikuara të martën treguan se inflacioni vjetor në SHBA arriti në 3.5% gjatë muajit qershor. Megjithëse ritmi i rritjes së çmimeve u ngadalësua krahasuar me muajin e kaluar, niveli mbetet dukshëm mbi objektivin prej 2% të Rezervës Federale. Rritja e çmimeve është ndikuar edhe nga mungesa globale e energjisë, e shkaktuar nga lufta në Iran.

Seanca dëgjimore u përqendrua në Raportin Gjysmëvjetor të Politikës Monetare të Fed-it, ku Warsh pritet të përballet me pyetje mbi strategjinë e bankës qendrore për frenimin e inflacionit dhe ecurinë e normave të interesit.

Në takimin e fundit të Komitetit Federal të Tregut të Hapur, pothuajse gjysma e politikëbërësve kishin sinjalizuar mundësinë e rritjes së mëtejshme të normave të interesit gjatë këtij viti. Megjithatë, të dhënat më të fundit për inflacionin kanë zbutur pritshmëritë për një lëvizje të tillë.

Kjo është dëshmia e parë e Kryetarit të Rezervës Federale, Kevin Warsh, para Kongresit që kur u bë kreu i bankës qendrore të vendit në maj.
Kjo vjen vetëm disa orë pasi u publikua raporti i Indeksit të Çmimeve të Konsumatorit për qershorin.
Raporti tregoi se rënia e ndjeshme e çmimeve të energjisë muajin e kaluar uli inflacionin vjetor në 3.5%, nga 4.2% në maj. Në bazë mujore, çmimet ranë me 0.4%, rënia e parë njëmujore në gjashtë vjet.