Numri i të vdekurve nga zjarret që shkatërruan Kilin qendror për disa ditë u rrit në 131 dhe më shumë se 300 njerëz janë ende të zhdukur.

Zjarret në Valparaiso thuhet se janë fatkeqësia më vdekjeprurëse e Kilit që nga një tërmet i vitit 2010. Zyrtarët kanë sugjeruar se disa mund të ishin vënë qëllimisht.

Presidenti Gabriel Boriç gjatë një vizite në rajon njoftoi se mobiljet e përdorura për Lojërat Panamerikane 2023 do t’u dhurohen viktimave. Ai tha se qeveria gjithashtu do të falë faturat e ujit për 9,200 shtëpi të prekura.

Zjarret filluan të premten në skajin lindor malor të Viña del Mar. Dy qytete të tjera, Quilpé dhe Villa Alemana, gjithashtu u goditën rëndë pasi zjarret u përhapën shpejt për shkak të erërave të forta.

Festivali Viña del Mar anuloi galën e hapjes në shenjë zie. Shumë këngëtarë pjesëmarrës duke përfshirë Alejandro Sanz, Pablo Alborán dhe Maná dërguan mesazhe solidariteti dhe njoftuan donacione.

Shërbimi Mjekësor Ligjor i Kilit ka thënë se shumë trupa të gjetur nga zjarret ishin në gjendje të keqe dhe të vështirë për t’u identifikuar, por punonjësit e mjekësisë ligjore do të merrnin mostra të materialit gjenetik nga njerëzit që raportonin të afërm të zhdukur.

“Shtëpia e prindërve dhe motrave të mia u dogj dhe fqinjët e mi, njerëzit që më njihnin kur isha e vogël vdiqën,” tha Gabriel Leiva, 46 vjeç, duke kaluar nëpër mbeturina në Viña del Mar. Ai tha se fqinjët e tij ishin “familja që nuk është nga gjaku, por nga zemra.”

Kombet e Bashkuara në një deklaratë shprehën ngushëllimet e tyre dhe njoftuan për ndihmë. Ndërkohë, Boriç, në një postim në Twitter, falënderoi presidentin amerikan Joe Biden për “mbështetjen e tij të rëndësishme” pas katastrofës.