Departamenti amerikan i Luftës ka publikuar paketën e gjashtë të materialeve të deklasifikuara për UFO-t, të cilat në dokumentet zyrtare quhen fenomene ajrore të paidentifikuara (UAP), sipas “The Times”.

Publikimi i ri përmban 71 materiale, përfshirë 55 dokumente, 15 video dhe një regjistrim audio.

Materialet janë nga periudha 1952–2025 dhe përfshijnë raste të raportuara nga ushtria amerikane, si dhe nga autoritete lokale në Kolorado.

Termi UAP përdoret nga autoritetet amerikane për objekte ose dukuri të vërejtura në ajër, për të cilat në momentin e raportimit, nuk ka të dhëna të mjaftueshme për të përcaktuar se çfarë janë.

Kjo nuk do të thotë se ato janë me origjinë jashtëtokësore.

Një pjesë e rëndësishme e materialeve të reja lidhet me një program të inteligjencës ushtarake amerikane të krijuar në vitin 2008, i cili studioi teknologji dhe ide të avancuara për të ardhmen e aviacionit dhe hapësirës.

Dokumentet përfshijnë studime mbi tema si motorët, që mund të mundësojnë udhëtim shumë të shpejtë në hapësirë, vrimat e krimbave, teknologjitë për ta bërë një objekt më pak të dallueshëm dhe mënyra të reja të lëvizjes së mjeteve ajrore.

Këto dokumente paraqesin tema kërkimore dhe ide të studiuara, jo prova se këto teknologji janë realizuar apo janë përdorur në mjete jashtëtokësore.

Në paketën e re janë përfshirë gjithashtu materiale historike nga “Project Blue Book”, një program i Forcave Ajrore amerikane që hetoi raportime për UFO gjatë shekullit të kaluar.

Një prej rasteve lidhet me pamje të regjistruara në vitin 1952 pranë Tremonton, në Utah.

Dosjet përfshijnë edhe raporte më të reja nga Lindja e Mesme, ku personeli ushtarak amerikan ka raportuar objekte të vërejtura nga sensorë dhe kamera ushtarake.

Në materialet e publikuara ka gjithashtu një raport për një objekt të paidentifikuar, të vërejtur mbi Detin e Verdhë në vitin 2023 dhe një raport nga një oficer policie në Kolorado.

Autoritetet amerikane theksojnë se këto materiale lidhen me raste që nuk janë zgjidhur përfundimisht, dhe nuk është përcaktuar me siguri se çfarë kanë qenë objektet ose dukuritë e raportuara.

Publikimi është pjesë e një procesi të administratës amerikane, për të nxjerrë gradualisht dokumente të qeverisë mbi UAP-të.