ELBASAN- Përfaqësuesja shqiptare U21 do të përballet sot me Hungarinë në “Elbasan Arena”. Ndeshja e vlefshme për eliminatoret e Europianit të të rinjve, do të luhet në orën 20:00.
Edhe pse është një ndeshje ku luajnë të rinjtë, sërish Policia e Elbasanit kërkon të mos gjendet e “surprizuar”, duke marrë të gjitha masat e nevojshme për mbarëvajtjen e rendit dhe sigurisë.
Siç njoftohet nga Policia e Elbasanit, do të jenë 200 punonjës të Policisë të angazhuar. Hyrja e sportdashësve do të fillojë në orën 18:00, me qëllim për të shmangur radhët e gjata në hyrje për në stadium.
Po ashtu, mësohet se do të ketë kontrolle të imtësishme dhe nuk do lejohet hyrja e sportdashësve me sende të forta, shishe (të çfarëdolloji), fishekzjarre, monedha apo metale (të çfarëdolloji), si edhe çelësa të ndryshëm.
Në orën 17:00, nuk do të lejohet parkimi i automjeteve përreth dhe përballë stadiumit, deri në përfundim të ndeshjes. Policia lajmëron gjithashtu se të gjitha lokalet që ndodhen përreth stadiumit, nga ora 18:00 dhe deri në përfundim të ndeshjes, të marrin masa që të jenë të mbyllura.
(el.sp/BalkanWeb)
