Kryeministri Edi Rama është pyetur në konferencën e përbashkët me presidenten e Komisionit Europian, Ursula von der Leyen, lidhur me përgjegjësinë politike për emërimet e bëra nga qeveria.

Rama e cilësoi diskutimin për “përgjegjësinë politike” si një debat të përsëritur në mjedisin publik, ndërsa tha se përgjegjësia e tij politike lidhet me vijimin e reformës në drejtësi dhe luftën kundër korrupsionit dhe krimit të organizuar.

“Kjo e përgjegjësisë politike është një avaz i përsëritur në pafundësi në mjedisin e diskutimit publik. Unë  nuk pretendoj që t’ju bëj të ndryshoni kuptim. Përgjegjësia ime politike është vetëm një, reforma në drejtësi të mos ndalet që lufta kundër korrupsionit dhe krimit të organizuar dhe të gjitha ngacmimeve që i bëhen organizmit të shtetit  nga veprime që bien ndesh me ligjin të zhvillohet si mision i sistemi. Kemi qenë në këtë vend, edhe pse ju jeni më të rinj, por kur gjërat që shohim sot dhe ndodhin sot as nuk mund të imagjinoheshin. Dhe kjo ka qenë vetëm deri përpara se sa ne të bënim reformën në drejtësi. Nëse pyetja juaj nënkupton që për përgjegjësi individuale duhet të përgjigjemi si në komunizëm, unë u them se atë sistem e kemi ndryshuar. Dhe nëse mendoni që kur një emërim bëhet dhe lind përgjegjësia e atij që emëron si rezultat që i emëruari mund të bëjë gabim, kjo është mënyrë e të pari si në kohën e komunizmit. Ne kemi detyrë të ndajmë me publikun qëllimet dhe të tregojmë se çfarë duam të bëjmë me mbështetjen e publikut, të japim llogari se si e bëjmë dhe cilido që tradhton qëllimin e përbashkët duhet të përballet me pasojat në anën tjetër të sistemit që është pushteti i pavarur gjyqësor. Askush nuk merret në mbrojtje kur vjen puna për t’i përballur me pasojat  e nje veprimi që hyn në sferën e hetimit   ”, tha ai.