Policia e Shkodrës ka reaguar lidhur me plagosjen e ndodhur paraditen e sotme në lagjen “Rus” të këtij qyteti. Policia sqaron se ngjarja ka ndodhur pas një konflikti të çastit. 38-vjeçari Artan Bobdaj është plagosur me thikë nga 78-vjeçari Musa Çinari.
Uniformat blu bëjnë me dije se kanë vënë në pranga autorin.
Sakaq nga pamjet e siguruara nga BalkanWeb shihej thika e mbetur në tokë, si edhe në vendin e ngjarjes ndodhej policia e cila kishte rrethuar zonën, për të zbardhur më tej detaje,.
NJOFTIMI:
Plagosi me mjet prerës (thikë), një 38-vjeçar, pas një konflikti të çastit, identifikohet dhe shoqërohet menjëherë nga Policia, autori i dyshuar.
Rreth orës 11:30, në lagjen “Rus”, dyshohet se pas një konflikti të çastit, është plagosur me mjet prërës (thikë), shtetasi A. B., 38 vjeç, banues në fshatin Bardhaj, Shkodër, i cili ndodhet në spitalin e Shkodrës, në kujdesin e mjekëve.
Menjëherë pas marrjes së njoftimit, shërbimet e Policisë kanë organizuar punën, me qëllim zbardhjen e rrethanave të këtij rasti, si dhe për identifikimin dhe kapjen e autorit.
Falë veprimeve të shpejta dhe profesionale operacionale, shërbimet e Policisë identifikuan dhe shoqëruan menjëherë në ambientet e Policisë, autorin e dyshuar të kësaj ngjarjeje, shtetasin M. Ç., 78 vjeç, banues në lagjen Partizani, Shkodër, për kryerjen e veprimeve të mëtejshme procedurale.
Grupi hetimor vijon punën për zbardhjen dhe dokumentimin e plotë ligjor të këtij rasti.
(BalkanWeb)
