Në mbledhjen e sotme në Komisionin për Politikën e Jashtme, u diskutua për projektin e OSHEE-së për reagimin e krizës ndaj pandemisë COVID-19.
Menaxheri i OSHEE, Ardian Çela u shpreh se rrjeti energjetik është prekur nga efektet negative që shkaktoi periudha e pandemisë.
Gjithashtu Çela foli edhe për problemet që kanë prekur rrjetin e ujësjellësit, duke u shprehur se në këtë sektor nuk janë arritur që të mblidhen borxhet.
Nga ana e tij deputeti Çollaku u shpreh se taksat dhe çmimet kanë vazhduar të rriten ndërsa qytetarëve nuk u është ofruar cilësia.
Koment ky i cili u kundërshtua nga kryetarja e Komisionit Mimi Kodheli, ndërsa u përgjigj se çmimet për energjinë nuk janë rritur.
“OSHEE nuk mund të ishte e izoluar nga efektet që solli Covid-19. Për shkak të situatës, viti 2020 kishte 93,4% nivelin e arkëtimeve, pra ka pasur një rënie. Gjithashtu për herë të parë nuk u realizua niveli i humbjeve pasi e mbyllëm me 24%. Po ashtu mosrealizimi i investimeve ishte një tjetër problem sepse kontraktorët i anuluan këto investime”, tha Ardian Çela.
Dule: Ky projekt është depozituar në 11 mars 2021, dhe ngre pyetjen nëse është thjesht burokraci apo ka një arsye tjetër vonesa prej shtatë muajsh?
“Kjo është kohë e mjaftueshme për negocimin. E gjithë negociata është mbyllur në korrik, më pas na ka kapur periudha e mbylljes së parlamentit. Ne nuk kemi kaluar çështje të reja. Kjo i referohet të gjithë situatës gjatë pandemisë, por vjen edhe si pasojë e rëndimit të situatës për shkak të krizës botërore”.
Këlliçi: Në çfarë shumë janë detyrimet e prapambetura dhe të bëjmë një përllogaritje përse kërkohet sot të merren 70 milion euro?
Çela: Borxhi është 36.6 miliardë lekë. Dua të theksoj se 90-95% janë kompani të ujësjellësve.
Këlliçi: Përse jemi në këto nivele?
Çela: Për kompanitë e ujësjellësit janë marrë disa veprime duke bllokuar edhe llogari bankare. Por nëse ka një nga pikat që nuk kemi realizuar është që tek ujësjellësit nuk kemi arritur të mbledhim borxhet. E pranoj që kemi dështuar, shpresoj që me reformën e re që qeveria ka nisur të ketë një ndryshim.
Grida Duma: Si i përgjigjet qeveria mungesës së reformave strukturore në sektorin energjetik
Koçi: Ne duhet të përqendrohemi më shumë tek arritja e marrëveshjeve, sigurisht do të trajtojmë edhe shqetësime të aspekteve të tjera, po besoj që përgjithësisht diskutimet të përqendrohen tek çështja sotme.
Kreshnik Çollaku: Si ka mundësi që kreditë shtohen, taksat shtohen, por cilësia bie dhe çmimi rritet?
Kodheli: Çmimi nuk është rritur. Kemi të gjithë dritë në shtëpi.
Çela: Sektori energjetik shqiptar kërkon rreth 1,6 miliard euro investime, një studim ky i bërë në vitin 2004. Ndërkohë 450 milionë euro janë investuar në këto shtatë vite dhe të gjithë jemi dëshmitar të përmirësimeve edhe pse ka akoma shumë vend për punë.
(BalkanWeb)
