Zyra e prokurorit holandez kërkoi një dënim me 30 vjet burg për një burrë sirian të akuzuar për torturim dhe përdhunim të të burgosurve ndërsa ishte anëtar i një grupi paraushtarak që mbështeste qeverinë e ish-Presidentit sirian Bashar al-Assad .

Rafik A., 58 vjeç (mbiemri i tij nuk u bë i ditur nga gjykata), akuzohet për 25 akuza, duke përfshirë torturë, dhunë seksuale dhe përdhunim – krime kundër njerëzimit – kundër nëntë personave në vitet 2013 dhe 2014. Ai mohon kategorikisht çdo përfshirje në këtë rast.

Është hera e parë që një gjykatë holandeze ka shqyrtuar krimet e kryera në Siri nga forcat pro-qeveritare. Është gjithashtu hera e parë që prokurorët e kanë klasifikuar dhunën seksuale si krim kundër njerëzimit.

Zyrtarët e sigurisë së Asadit janë nxjerrë në gjyq edhe në vende të tjera evropiane, përfshirë Gjermaninë.

Dëshmitarët që i mbijetuan sulmeve të Rafik A. kanë rrëfyer torturat fizike dhe psikologjike ndaj të cilave iu nënshtruan. “Ai jo vetëm që më shtypi trupin, por më shkeli edhe shpirtin. Ishte makthi më i keq i jetës sime”, tha njëri nga ata që “hynë në burg si fëmijë dhe doli si i rritur i plagosur”.

Sipas prokurorëve, Rafik A. ishte kreu i ekipit të marrjes në pyetje të Forcave të Mbrojtjes Kombëtare (NDF) në Salamiyah të Sirisë, midis viteve 2013 dhe 2014. NDF ishte një grup paraushtarak që luftoi përkrah qeverisë së Asadit.

58-vjeçari u arrestua në vitin 2023 në Holandë, ku kishte jetuar për disa vite si azilkërkues.

Ligji holandez lejon që të huajt të gjykohen për krime të kryera në vende të tjera, me kusht që autorët ose një nga viktimat e tyre të jetojë në Holandë.

Avokatët e Rafik A. dhe avokatët e viktimave janë planifikuar të japin argumentet e tyre përfundimtare nesër. Vendimi do të shpallet më 9 qershor.