Kremlini lavdëroi të martën shefin e kompanisë Tesla, Elon Musk, për sugjerimin e një marrëveshjeje të mundshme paqeje për t’i dhënë fund luftës në Ukrainë, pasi Kievi e qortoi miliarderin për propozimin e kushteve që i sheh si shpërblyese të Rusisë.

“Është shumë pozitive që dikush si Elon Musk po kërkon një rrugëdalje paqësore nga kjo situatë”, u tha gazetarëve zëdhënësi i Kremlinit Dmitry Peskov në një konferencë.

“Krahasuar me shumë diplomatë profesionistë, Musk është ende në kërkim të mënyrave për të arritur paqen. Dhe arritja e paqes pa përmbushjen e kushteve të Rusisë është absolutisht e pamundur,” shtoi ai.

Në një sondazh në Twitter të postuar të hënën, shefi i Tesla-s i propozoi Ukrainës t’i dorëzojë përgjithmonë Krimenë Rusisë, që referendumet e reja të mbahen nën kujdesin e OKB-së për të përcaktuar fatin e territorit të kontrolluar nga Rusia dhe që Ukraina të pajtohet me neutralitetin.

Kievi thotë se nuk do të pranojë kurrë të lëshojë tokën e marrë me forcë dhe referendumet e ligjshme nuk mund të mbahen në territorin e pushtuar ku shumë njerëz janë vrarë ose dëbuar. Pasi Vladimir Putin njoftoi aneksimin e katër provincave të Ukrainës javën e kaluar, Kievi tha se po aplikonte për t’u bashkuar me NATO-n dhe nuk do të negocionte me Rusinë për sa kohë që Putin është president.

Moska ka qenë gjithmonë e hapur për një përfundim të negociuar të konfliktit, shtoi Peskov. Ai kritikoi një dekret të ri ukrainas, të nënshkruar nga Zelenskiy të martën, i cili thotë se Kievi nuk do të negociojë drejtpërdrejt me Putinin për t’i dhënë fund konfliktit.