Ish-Sekretari Ndërkombëtar i Lëvizjes Socialiste për Integrim dhe njëherësh një nga kandidatët që e ka emrin në listën për deputetë të LSI-së, Ralf Gjoni u përmend sot në emisionin “Të Paekspozuarit” nga moderatori Ylli Rakipi si një nga njerëzit që ka pirë kafe sot me eurodeputetin Knut Flackenstein dhe me shumë gjasa pritet të hyjë si deputet i LSI-së në Parlament.
E pyetur për një gjë të tillë, zonja Kryemadhi nuk shfaqi asnjë shqetësim. Ajo pranoi se merkato për blerjen e deputetëve ka nisur tashmë.
“Zoti Rakipi vendimi i LSI është i qartë, s’ka asnjë hap pas. Kush do të shkojë në atë Kuvend është zgjedhja e tyre. Janë të pakonsiderueshëm për ne. Merkatoja e blerjes ka nisur, është rritur çmimi shumë”,- tha ajo.
Zonja Kryemadhi tregoi më tej edhe një sms, që Gjoni i kishte dërguar Kejdi Mehmetajt. “Kur hynë ato vajzat deputete që bënë amendamentet e tetë kërkesave të studentëve, i shkroi Kejdi Mehmetajt: Ti duhet të dorëzoje mandatin. Si hyn ti në atë Parlament kriminelësh etj… Tani Ralfi u bë një nga kriminelët që do shkojë atje. Kjo është zgjedhja e Ralfit, por Ralfi nuk përfaqëson opozitën”,- tha ajo.
Më tej Kryemadhi tha se LSI është e vetmja forcë politike që ka një dokument zyrtar, një rezolutë me tetë pika që kanë të bëjnë me çështjen e integrimit evropian.
“Këto janë të vetmet kushte që LSI ka vendosur me PD-në në marrëveshjen e saj për të qenë të unifikuar në opozitë, pra një front i bashkuar opozitar. I vetmi kusht që ka LSI janë hapja e negociatave. Prandaj sot më shumë se kurrë opozita është e bashkuar. Vetëm një nuk është me ne, Rilindja. Edhe pjesa më e madhe e socialistëve janë me opozitën”,- vijoi ajo.
(m.a/BalkanWeb)
