NGA JETON SELIMI
Është një ndër yjet e kampionatit holandez dhe tashmë edhe mediat ndërkombëtare po i kushtojnë gjithnjë e më shumë hapësira, aq sa ‘Uefa.com’ para pak ditësh e krahasoi me yllin e Barcelonës, Nejmar. Megjithatë, Milot Rashica refuzon me modesti krahasimin me brazilianin e famshëm dhe duke folur për “Supersportin” shprehet se ndihet i vlerësuar, por mundohet të qëndrojë me këmbë në tokë.
“Është vlerësim shumë i madh, por besoj se është pak herët, sepse unë sapo kam filluar. Por, është një motivim shtesë për mua. Këto që shkruhen dhe fliten janë gjëra të mira për mua, por ato nuk të ndihmojnë të shkosh me Kombëtaren apo të paraqitesh mirë në ndeshje. Edhe pse vetëm 19-vjeçar, Rashica e ka të qartë se çfarë duhet të bëjë, për të vazhduar rritjen si futbollist dhe për të pritur deri në fund një ftesë nga trajneri De Biasi, për finalet e “Euro 2016”.
“Gjithçka që duhet të bëj është të vazhdoj në këtë mënyrë si po eci me Viteshe-n, të ndihmoj klubin në objektivat që ka, të shënoj gola dhe të jap asist. Paraqitjet e mira me Viteshen mund të më dërgojnë në Kampionatin Europian, asgjë tjetër. Shpresoj që të vazhdoj me formën që po kaloj dhe pse jo të grumbullohem sërish me Kombëtaren”. Talenti i lindur në Vushtrri nuk shpërqendrohet as nga zërat e merkatos, që pas ekipeve si Ajax, PSV e Galatasaray, e lidhin me gjigantët nga Serisë A, Napoli dhe Lazio, por edhe me Everton, Tottenham dhe Çelsi në Premier League-n angleze.
“Është mëse normale që ndihem mirë për interesimin nga klubet e tjera. Por, për momentin jam i përqendruar vetëm te Viteshe, nuk mendoj për asgjë tjetër. Synoj ta mbyll sezonin në mënyrën më të mirë të mundshme dhe shpresojmë të arrijmë play-off që na dërgon në Kupat e Europës. Unë do të mundohem ta mbyll një sezon shumë të mirë dhe më pas kur të përfundojë sezoni do ta diskutojmë, edhe pse për momentin jam shumë i lumtur këtu. Me mua nuk ka biseduar askush. Nuk e di, ndoshta kanë folur me klubin ose menaxherin, megjithatë për momentin nuk jam i interesuar, pasi jam i përqendruar vetëm te Viteshe”.
(el.sp/Gazeta Shqiptare/BalkanWeb)
