Vendi prej ditësh është përfshirë nga moti i keq, me reshje shiu në zona të ndryshme të vendit dhe reshje bore në zonat malore.
Ndërkohë situata e përmbytjeve në Shkodër duket se është më shqetësuese. Bashkia Shkodër ka publikuar të dhënat e reja rreth përmbytjeve, ku bëhet me dije se në njësinë administrative në Anën e Malit janë të përmbytura 1100 Ha.
Ndërsa disa rrugë janë të pakalueshme nga mjete të ulëta dhe mund të jenë të kalueshme vetëm me mjete ushtarake.
Njoftimi:
Situata në Bashkinë Shkodër nga raportimet e deritanishme ora 08.00 është si më poshtë:
1.Kuota Drin 6.80 m (e rritur 1 m me oren 16.00 të ditës së mërkurë) 7.50 m kuota max
2.Kuota Liqen 8.55 ( e rritur me 40 cm) 8.70 m kuota max
Ndryshe nga një ditë më parë ku kishim 600 Ha, këtë të enjte sipërfaqja e përmbytur ka shkuar 1920 Ha.
NjA Ana Malit ka të përmbytura 1100 Ha.
Në rrugën e Obotit nuk kalohet me mjete të ulëta, vetëm me mjetet e kalueshmërisë së lartë ushtarake ( 1 mjet me 4 forca ne dispozicion)
Ujesjellësi Oblika 1 momentalisht është jashtë funksionit.
Dajç rruga Darragjat-Shirq e pakalueshme në vendin e quajtur Urrelat, sip toke rreth 300 Ha.
Berdice 200Ha, Guri Zi 170 Ha, Velipoje 150 Ha.
Rruga Theth-Breglumi është e bllokuar nga rreshqitjet e dherave. Strukturat e EC Bashkia Shkoder janë në terren për monitorimin e situatës.
Gjithashtu për situatën në Shkodër ka reaguar edhe Ministria e Mbrojtjes duke bërë me dije se Agjencia e Mbrojtjes Civile, ndodhet në terren për t’ju përgjigjur qytetarëve,.
Sipas të dhënave nga Drejtoria e Gatishmërisë dhe Koordinimit të Përgjigjes Emergjente, në Agjencinë e Mbrojtjes Civile reshjet e rëna gjatë natës kanë shkaktuar problematika në disa qarqe të vendit. Agjencia e Mbrojtjes Civile ka vënë në dispozicion të bashkisë së Shkodrës mjete të kalueshmërisë së lartë dhe mjete ujore. Një mjet i kalueshmërisë së lartë dhe efektivë të FA janë angazhuar në ndihmë të banorëve në njësinë Ana e Malit, fshati Obot. Si pasojë e reshjeve të shumta orët e fundit aksi kryesor i kësaj rruge është bllokuar, duke e bërë të pakalueshme nga mjetet e vogla.
Ndërkohë vijon tërheqja e ujit në disa sipërfaqe toke në Bërdicë, Guri i Zi e Velipojë.
Punonjës të ARRSH janë duke punuar për pastrimin e dherave në akset Theth-Breglumi, Darragjat-Shirq, njësia administrative Dajç si dhe në rrugën e Lumit të Vlorës në vendin e quajtur ” Qafa e Pëllumbit”.
Tërheqje të ujit ka edhe nga sipërfaqet në qarkun e Lezhës, në njësinë Balldren, ish-këneta e Torovicës, në zonën e Laçit, ish kënetën e Gjonëmit.
Sipas raportimeve hidrovorët punojnë normalisht, nën kuotat kritike.
Kuotat e lumenjve Drin, Gjadër dhe Mat janë normale.
Në fshatin Kishavec, bashkia Dibër janë evakuuar disa bagëti, për shkak të depërtimi të ujit nga përroi i fshatit, ndërsa po punohet për riparimin e dëmtimeve në urën e Çikut.
Në fshatrat Toplane-Serme, njësia administrative Temal dhe në zonën e Vermoshit, punonjësit e OSHEE ndodhen në terren për rikthimin e furnizimit me energji elektrike në këto zona.
Në të gjtha qarqet e tjera të vendit situata paraqitet normale.
Agjencia e Mbrojtjes Civile, në Ministrinë e Mbrojtjes është e gatshme t’u përgjigjet në çdo kohë kërkesave të pushtetit vendor, duke vënë në dispozicion të komuniteteve të gjitha kapacitetet e nevojshme.
(BalkanWeb)