Qeveria amerikane njoftoi të premten se po vendoste sanksione ndaj tre individëve dhe nëntë kompanive, katër në Hong Kong, katër në Emiratet e Bashkuara Arabe dhe një në Oman për dyshime se kanë lehtësuar eksportet e naftës iraniane në Kinë.
Vendimi i Departamentit të Thesarit pasoi sanksionet e shpallura të premten kundër individëve dhe kompanive që dyshohet se kanë ndihmuar Iranin të blejë armë dhe komponentë të përdorur në prodhimin e dronëve dhe raketave balistike. Sanksionet u vendosën vetëm disa ditë para udhëtimit të Donald Trump në Kinë, ku presidenti amerikan pritet të shtyjë homologun e tij kinez Xi Jinping që të ndihmojë në zgjidhjen e krizës me Iranin dhe të hapë Ngushticën e Hormuzit .
Sekretari i Thesarit i SHBA-së, Scott Bessant, tha se administrata Trump do të vazhdojë të rrisë presionin mbi Teheranin për t’i mohuar regjimit iranian dhe Gardës së tij Revolucionare burimet për të financuar programin e tij bërthamor, pajisjet ushtarake ose për të mbështetur përfaqësuesit në Lindjen e Mesme më të gjerë. “Departamenti i Thesarit i SHBA-së do të vazhdojë ta shkëpusë regjimin iranian nga rrjetet financiare që përdor për të financuar aktet e terrorizmit dhe për të destabilizuar ekonominë globale”, tha Bessant.
