TIRANË

Detaje të reja nga vrasja e 28-vjeçarit Vilson Tafçiu (Ndokaj) në zonën e “Astirit” në Tiranë, mbrëmjen e 20 janarit. Mësohet se autori i dyshuar, të cilit policia i është vënë pas është Noel Dishi nga Dibra e banues në Sukth. Gazetarja Dorjana Bezat raportoi për “BalkanWeb” se Dishi ka qenë shok me viktimën dhe kanë qenë bashkë madje edhe në Francë dhe Zvicër.

Policia ka marrë në pyetje familjarët e autorit të dyshuar në Sukth të cilët kanë thënë se Vilsonin e njihnin si shok të djalit dhe se shkonte shpesh në shtëpinë e tyre.

Po kështu gazetarja Bezat duke iu referuar burimeve nga grupi hetimor bëri me dije se familjarët kanë deklaruar se prej më shumë se 2 javësh mes Vilson Tafçiut dhe Noel Dishit ka ndodhur një zënkë që ka prishur miqësinë por motivin e saj nuk e dine. Prindërit kanë pohuar se me të birin nuk janë takuar që një ditë para se të ndodhte vrasja.

Policia po vijon kontrollet për kapjen e tij dhe po kështu po analizohen qelizat telefonike për të vërtetuar praninë e të dyshuarit në zonën ku ndodhi krimi si edhe lëvizjet e tij.

28-vjeçari kishte pak kohë që ishte kthyer nga jashtë shtetit dhe mbrëmjen e së hënës po konsumonte kafe në një lokal të njohur në zonën e Astirit me dy vajza kur u nxor jashtë dhe u ekzekutua me një plumb në zemër.

Policia arriti në identifikimin e autorit të dyshuar duke iu referuar të kaluarës së viktimës dhe për faktin që ai ka dalë jashtë lokalit kur është thirrur, çka tregon se mes tyre ka pasur njohje.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb