Qeveria e Sllovenisë filloi të enjten procedurën e njohjes së Shtetit të Palestinës, për të ndihmuar në përfundimin e dhunës në Gaza, njoftoi kryeministri Robert Golob.
“Mizoritë që ne shohim në Gaza çdo ditë janë të papranueshme dhe duhet të ndalen,” tha Golob në një konferencë shtypi pas një sesioni qeveritar.
Koalicioni qeveritar i Sllovenisë, i cili përbëhet nga tre parti të qendrës së majtë, është i bashkuar në planin për të njohur shtetin e Palestinës, tha Golob, duke shtuar se ai shpreson se vendet e tjera do të ndjekin Slloveninë.
Qeveria sllovene do t’i dërgojë parlamentit një kërkesë zyrtare për njohjen e shtetit të Palestinës deri më 13 qershor.
“Jam e kënaqur që qeveria ka ndërmarrë një hap vendimtar dhe të pakthyeshëm në procesin e njohjes së Palestinës”, tha Ministrja e Jashtme Tanja Fajon në platformën e mediave sociale X.
“Sllovenia dërgon kështu një mesazh të qartë mbi urgjencën e paqes në Lindjen e Mesme dhe një zgjidhje me dy shtete,” shtoi ajo.
Mbi 100 studentë nga Fakulteti i Shkencave Sociale të Universitetit të Lubjanës protestuan për të dytën ditë radhazi të enjten, duke i bërë thirrje universitetit të shpallë një dënim të qartë të gjenocidit në Gaza dhe t’i japë fund çdo bashkëpunimi me Universitetin Bar Ilan të Izraelit.
Sllovenia, një anëtare jo e përhershme në detyrë e Këshillit të Sigurimit të Kombeve të Bashkuara, lëshoi një deklaratë të përbashkët me Spanjën, Maltën dhe Irlandën në fund të marsit duke thënë se vendet janë të gatshme të njohin shtetin e Palestinës kur “rrethanat janë të përshtatshme”.
(A.A/BalkanWeb)
