Xi Jinping e priti Donald Trumpin në Sallën e Madhe të Popullit në Pekin, me nderime ushtarake dhe masa të rrepta sigurie në qendër të kryeqytetit kinez, në fillim të një takimi të konsideruar veçanërisht të rëndësishëm për marrëdhëniet midis dy vendeve.

Të dy udhëheqësit shtrënguan duart para kamerave dhe më pas morën pjesë në ceremoninë zyrtare të mirëseardhjes, me një paradë ushtarake dhe interpretimin e himneve kombëtare.

Sheshi Tiananmen u bllokua për vizitën, ndërsa prania e forcave policore dhe ushtarake ishte e madhe në të gjithë zonën.

Presidenti amerikan mbërriti në Pekin i shoqëruar nga një delegacion i madh biznesi, përfshirë Elon Musk, drejtorin e Nvidia-s, Jensen Huang dhe drejtorin ekzekutiv të Apple, Tim Cook .

Në deklaratat e tij të para në fillim të takimit me Donald Trump, Xi Jinping theksoi se “interesat e përbashkëta të Kinës dhe Shteteve të Bashkuara i tejkalojnë dallimet e tyre”, duke nënvizuar se suksesi i dy vendeve “është një mundësi për njëri-tjetrin”.

Presidenti kinez tha gjithashtu se “stabiliteti në marrëdhëniet Kinë-SHBA është pozitiv për të gjithë botën”, ndërsa deklaroi se mezi pret të shkëmbejë pikëpamje me presidentin e SHBA-së mbi “çështje të rëndësishme”.

“Le të jetë viti 2026 një vit historik – një moment historik për marrëdhëniet Kinë-SHBA, që lidh të kaluarën me të ardhmen”, tha Xi.

Nga ana e tij, Donald Trump deklaroi se ka një “marrëdhënie fantastike” me Xi Jinping, duke shprehur besimin e tij se marrëdhëniet midis Uashingtonit dhe Pekinit “do të bëhen më të mira se kurrë”.

Fokusi i bisedimeve është në marrëdhëniet tregtare SHBA -Kinë , teknologjinë dhe zhvillimet në Lindjen e Mesme.

Trump po kërkon të ruajë armëpushimin tregtar të rënë dakord në muajt e mëparshëm, ndërsa Uashingtoni përpiqet të zvogëlojë deficitin tregtar me Kinën pa çuar në një përshkallëzim të ri të luftës ekonomike.

Nga ana e saj, Pekini po shtyn përpara lehtësimin e kufizimeve të SHBA-së mbi eksportet e teknologjisë së përparuar dhe mikroçipave për kompanitë kineze.

Sipas mediave amerikane, Trump pritet gjithashtu t’i kërkojë Xi Jinping të përdorë ndikimin e Kinës mbi Iranin për të çtensionuar Lindjen e Mesme.

Një nga çështjet më të ndjeshme për palën kineze mbetet Tajvani.

Pekini ka shprehur kundërshtim të fortë ndaj shitjes së armëve amerikane në Taipei, me mediat shtetërore kineze që kanë përsëritur ditët e fundit se kjo çështje përbën një “vijë të kuqe” në marrëdhëniet me Shtetet e Bashkuara.

Pavarësisht mosmarrëveshjeve, si Uashingtoni ashtu edhe Pekini duket se po kërkojnë të ruajnë komunikim të qëndrueshëm gjatë një periudhe pasigurie ndërkombëtare në rritje.

Kontaktet midis dy delegacioneve pritet të vazhdojnë të premten, sipas orarit të vizitës.