Të paktën 25 trupa janë zbuluar në një varr masiv në qytetin Kurmuk, në shtetin e Nilit Blu në Sudanin juglindor. Autoritetet lokale kanë akuzuar Forcat paraushtarake të Mbështetjes së Shpejtë (RSF) për vrasjen dhe ekzekutimin e viktimave.

Varri masiv u zbulua nga Forcat e Armatosura Sudaneze gjatë operacioneve të kontrollit dhe pastrimit në pjesën verilindore të Kurmukut, rreth një muaj pasi ushtria rifitoi kontrollin e qytetit pas disa javësh luftimesh të ashpra.

Komisioneri i Kurmukut, Abdel Aty Mohamed al-Faki, tha se në varr janë gjetur eshtrat e fëmijëve, grave dhe pjesëtarëve të stafit të spitalit. Sipas tij, viktimat ishin ekzekutuar pranë Jebel Fankat, një pozicion strategjik në majë të një kodre që RSF-ja e kishte përdorur për të kryer sulme me dronë gjatë luftimeve për kontrollin e zonës.
RSF-ja nuk ka bërë ende ndonjë koment lidhur me akuzat.

Forcat e Mbështetjes së Shpejtë, të cilat janë në luftë me ushtrinë sudaneze që prej prillit 2023, janë akuzuar më herët për vrasje masive dhe abuzime të rënda ndaj civilëve në disa pjesë të Sudanit, përfshirë Khartumin, el-Fasherin dhe shtetin e Geziras.
Zbulimi i varrit në Kurmuk vjen në një kohë kur luftimet në shtetin e Nilit Blu vazhdojnë. Sipas raportimeve nga terreni, RSF-ja ka kryer sulme me dronë në qytet për të dytën ditë radhazi.

Ndërkohë, luftime të ashpra po zhvillohen edhe në Darfurin Perëndimor, një nga bastionet kryesore të RSF-së. Forcat e armatosura sudaneze raportohet se kanë zmbrapsur sulmet e grupit paraushtarak në Bir Saliba, rreth 40 kilometra nga qyteti el-Geneina.

Lufta në Sudan ka shkaktuar një prej krizave më të rënda humanitare në botë. Sipas Organizatës Botërore të Shëndetësisë, konflikti ka shkaktuar rreth 40 mijë viktima, ndërsa më shumë se 14 milionë njerëz janë detyruar të largohen nga shtëpitë e tyre.