Së paku 10 civilë kanë humbur jetën, ndërsa 35 të tjerë janë lënduar në një sulm të kryer nga forcat besnike të regjimit të Bashar al-Asadit në një treg në provincën veriperëndimore siriane të Idlibit.

Objektivi i sulmit artilerik ishte një treg në qendër të rrethit jugor Ariha. Duke cituar burimet spitalore, të paktën 10 persona humbën jetën në sulm dhe se 35 civilë të tjerë u lënduan.

Druhet se numri i të vdekurve mund të jetë edhe më i lartë.

Sulmi erdhi në mes të raundit të gjashtë të bisedimeve të drejtuara nga Komiteti për Kushtetutën e Sirisë në zyrën e Kombeve të Bashkuara në Gjenevë.

Idlibi është enklava më e madhe e kontrolluar nga opozita siriane, e cila është nën rrethim nga forcat besnike të regjimit të Bashar al-Asadit dhe aleatëve të tij.

Me ndërmjetësimin e Turqisë, Rusisë dhe Iranit, gjatë negociatave të majit 2017 në Astana, Idlibi u shpall një nga katër zonat e de-përshkallëzimit. Forcat besnike të regjimit të Asad-it shkelën marrëveshjen dhe pushtuan tre zona, dhe në Soçi më 17 shtator të vitit 2018, u arrit një marrëveshje shtesë për armëpushim në Idlib dhe krijimin e një zone të de-përshkallëzimit.

Sipas marrëveshjes, forcat opozitare tërhoqën armët e rënda nga rajoni dhe forcat besnike të regjimit të Asad-it nuk ndaluan sulmet e artilerisë dhe ajrore në rajon.

Turqia dhe Rusia ranë dakord në mars të vitit të kaluar mbi një protokoll që u bënte thirrje të gjitha palëve në Idlib që të ndërpresin zjarrin, ndërsa forcat turke dhe ruse, si garantuese të armëpushimit, po kryejnë së bashku patrulla kontrolli përgjatë vijave të ndarjes.