Presidenti Ilir Meta ka zhvilluar një takim me Ambasadorin e Republikës Çeke, Karel Urban, takim i cili përkon edhe me fillimin e Presidencës Çeke të Bashkimit Europian.
Me anë të një postimi në Facebook, kreu i shtetit bëri me dije se ambasadori çek ka bërë një prezantim të prioriteteve të Presidencës së vendit të tij në BE.
Meta ka theksuar gjithashtu edhe rëndësinë e çeljes së negociatave për vendintonë dhe Maqedoninë e Veriut.
“Ishte një kënaqësi e veçantë të prisja në takim Ambasadorin e Republikës Çeke, Karel Urban me rastin e fillimit të Presidencës Çeke të Bashkimit Europian.
Më paraqiti përparësitë e vendit të tij në drejtimin e BE, të kushtëzuara në një pjesë të madhe edhe nga gjendja e krijuar pas agresionit rus në Ukrainë.
Urova për sukses të plotë Presidencës Çeke të BE dhe theksova rëndësinë e zhbllokimit të ngërçit midis Maqedonisë së Veriut dhe Bullgarisë, për fillimin e procesit të hapjes së negociatave me Shqipërinë dhe Maqedoninë e Veriut, si një akt i qartë dhe i vendosur për perspektivën e anëtarësimit të plotë të dy vendeve në familjen europiane, por edhe për forcimin e bashkëpunimit të vendeve të rajonit drejt perspektivës së përbashkët të anëtarësimit në BE.
