Në disa komisariate të vendit është organizuar një protestë e njoftuar nga PD në lidhje me ngjarjen e rëndë të ndodhur disa ditë më parë në Kavajë, ku u vetëvar në ambientet e Komisariatit, i riu Ilvi Meta.
Protesta e heshtur e cila u paralajmërua nga Sali Berisha nisi në Fier, Lezhë, Vlorë, Gjirokastër, Shkodër, Durrës, Kukës.
I pranishëm në Fier ishte edhe Luan Baçi i cili u shpreh në Komisariatet e Policisë ka një situatë jo të zakonshme dhe se policia duhet të jetë patjetër në shërbim të qytetarëve.
“Një situate jo e zakonshme në komisariatet e policisë. Nuk eshtë rasti i parë rasti i 31 vjeçarit qe dha jetën në qelinë e Kavajës nga papërgjegjshmëria e drejtuesve të policisë. Duhet me patjetër që policia të jetë në shërbim të qytetarëve. Këta zotërinjtë e policisë që janë këtu dhe në çdo komisariat tjetër mbahen me taksat e qytetareve, me taksat tona. Por ato taksa këta i keqpërdorin. Këta janë të dhunshëm dhe një nga problemet kryesore qe kane komisariatet e policisë janë militantët police dhe oficere policie të Partisë Socialiste që kryejnë veprime të tilla dhe kjo është shumë alarmante”, ka thënë ai.
Gjithashtu protestës i është bashkuar edhe qyteti i Korçës. Qytetarët kanë ndezur qirinj në ambientet e komisariateve.
Qytetarët e Durrësit gjithashtu janë bërë bashkë dhe kanë ndezur qirinj në Komisariatin e qytetit.
Gjithashtu dhjetëra qytetarë, demokratë beratas e kanë filluar protestën e tyre paqësore disa metra përpara DVP-së Berat,nga ku turma e protestuesve u nis drejt Komisariatit të Policisë së Beratit,me qirinj në duar.
Protesta paqësore u krye në homazh të djalit që ndërrojë jetë në Komisariatin e Kavajës, për të cilin policia nuk sqaroi mënyrën sesi ndodhi dhe sesi u zbulua vdekja e rëndë.
