Mijëra njerëz në të gjithë Italinë kanë protestuar kundër kushteve të rënda të burgut ku po mbahet Alfredo Cospito, pasi frika për shëndetin e anarkistit 55-vjeçar është rritur me grevën e tij të urisë që zgjati 150 ditë.

Cospito është dënuar me burgim të përjetshëm në vitin 2012, pasi qëlloi në këmbë shefin e një kompanie të energjisë bërthamore dhe vendosi dy bomba përballë një akademie policie pranë Torinos në vitin 2006. Megjithatë të dy sulmet nuk ishin fatale dhe askush nuk u lëndua.

Në maj të vitit të kaluar ai u transferua në 41-bis, një formë e izolimit të njohur si “burg i vështirë” dhe ku mbahen të mbyllur bosët e mafies dhe kriminelë të tjerë.

Në tetor Cospito filloi një grevë urie dhe është zotua se do të protestojë kundër 41-bis ‘deri në frymën e tij të fundit’.

“Sot jam gati të vdes që bota të kuptojë se çfarë është në të vërtetë 41-bis. Jam i bindur se vdekja ime do të jetë një pengesë për këtë regjim”, ka thënë ai.

Mediat e huaja shkruajnë se Cospito ka humbur më shumë se 50 kg dhe shpeshherë ka qenë në spital, duke ngritur kështu shqetësime se shëndeti i tij mund të rëndohet në mënyrë të pariparueshme.