Dita kushtuar atyre që dhanë jetën për çlirimin e atdheut ka bashkuar çdo vit drejtuesit e institucioneve vendor të Beratit për të kryer homazhe në Varrezat e Dëshmorëve të qytetit por këtë vit, për shkak të situatës së pandemisë nga virusi Covid-19, ky 5 Maj na gjen ndryshe.
Ceremonitë në Ditën e Dëshmorëve të Atdheut janë kryer të ndara. Lejen fillimisht për të nderuar të rënët në luftë e kanë pasur veteranët dhe familjarët e dëshmorëve. Ata i janë drejtuar Varrezave të Dëshmorëve të qytetit rreth orën 09:30 të mëngjesit, kur edhe kanë filluar ceremoninë përkujtimore në nderim të tyre. Me kurora e buqeta me lule ndër duar, veteranët e luftës dhe familjarë të dëshmorëve kanë kryer homazhe në varrezat ku prehen ata që humbën jetën për çlirimin e vendit tonë.
“Me grushtin lart” veteranët e Luftës Antifashiste Nacional Çlirimtare, kryen homazhe pranë memorialit kushtuar dëshmorëve dhe në të gjitha varret ku prehen ata që dhanë jetën për lirinë e vendit të tyre. Veteranët shprehen se, duke respektuar ligjet e shtetit që nuk lejon grumbullime, ata i kryen këtë vit homazhet të ndara nga drejtuesit e pushtetit vendor dhe përfaqësuesit e partive politike. Ata kanë marrë një leje të posaçme për vetëm 30 minuta për të kryer ceremoninë e nderimit e përkujtimit të shokëve të tyre, të rënë në luftë pasi-siç shprehen vetë ata-kjo është një ditë e shënuar për të gjithë veteranët e luftës që e kanë obligim të nderojnë dhe përkujtojnë dëshmorët që dhanë jetën për lirinë e atdheut.
(BalkanWeb)
