TIRANE – Kreu i Bashkisë së Tiranës, Erion Veliaj, ishte i pranishëm sot në kryeqytet për ceremoninë në sheshin “Skënderbej” pas çmimit të parë të marrë në Barcelonë.

Veliaj falënderoi punonjësit e Bashkisë dhe kryeministrin Edi Rama për punën e bërë për ndërtimin e sheshit.

“Në finale ishim me Amsterdamin, Barcelonës, Ukrainën dhe Finlandën. Mes 279 projekteve fituam. Sot mund të ulim armën dhe të themi që jemi krenarë për vlerësimin që morëm.

Nga rrethrrotullimi më i madh në Ballkan, nga një situatë ku kishim 150 mijë makina, sot janë 150 mijë njerëz në ditë që e kthejnë sheshin në hapësirën pedonale më të madhe në Ballkan.

Një gjë që kemi mësuar unë dhe Edi nga shoku Gramoz është që të mos fillojmë nga emrat se do ngelen shumë njerëz pa falënderuar,” tha Veliaj.

“Një nga gjërat që vlerësoi juria ishte ndryshimi i qëndrimeve dhe i vlerave që gjithësecili ka, nuk u vlerësua vetëm infrastruktura.

Pas histerisë kolektive për këtë shesh, ne kemi ndryshuar këtë mentalitet. Ekipet e bashkisë meritojnë një bravo të madhe.

Shumë njerëz thonë ne nuk kemi bukë të hamë, për çfarë do na duhet sheshi. Epo qyteti nuk është furrë buke, por njerëzit nuk jetojnë vetëm nga buka. Por dhe nga aktivitetet e ekonomia që sjell qëndra. 200 aktivitete ekonomike janë zhvilluar në këtë shesh. Në koncertin e Rita Orës dhe Ermal Metës erdhën shumë turistë.

Një nga qindra rrufetë që goditën Tiranën, goditën dhe Sahatin, por u rregullua brenda natës dhe askush s’e vuri re njeri,” u shpreh kryebashkiaku.

Kreu i Bashkisë nënvizoi se është diskutuar gjatë më lidhje me çështjen e teatrit, ku sikurse edhe arkitekti i njohur në gjithë botën Bjarke Ingels vlerëson , është i pamundur rikonstruktimi i një godine që nuk ka qenë ndërtuar për teatër.
“Ne kemi pasur një diskutim shumë të gjatë me arkitektin Bjarke Ingels dhe besoj dje shqiptarët patën një shans të shikonin të gjithë argumentet pse edhe gjeometrikisht, për atë që ka nevojë teatri, për xhepat anësore, për nënskenën, për mbiskenën, për kushtet , për higjienë, për mbrojtjen nga zjarri, ne nuk mund të rikonstruktojmë diçka që nuk ishte bërë origjinalisht si një teatër”, tha ai.

Teksa falënderoi artistët dhe aktorët për diskutimet rreth teatrit, Veliaj shprehu bindjen se në përfundim të projektit për teatrin e ri, Tirana do të marrë një tjetër çmim për teatrin më të bukur në Bashkimin Europian.
“Dua të falënderoj publikisht sot të gjithë aktorët, të gjithë arkitektët që i kanë dhënë besim këtij procesi. Unë jam i bindur sot dhe nuk ma heq njeri këtë bindje dhe jam i sigurt që ndaj këtë edhe me kryeministrin, pas disa vitesh, ne padyshim do të marrim një çmim për teatrin më të bukur në Bashkimin Euriopian ku jo vetëm që do të jemi anëtar por do të kemi edhe një stoli ku bëhet art i mirëfilltë në kushte dinjitoze dhe në kushte moderne. Duke u ndalur tek sheshi Skënderbej, Veliaj deklaroi se ky projekt është rezultat i një pune kolosale e nisur nga Edi Rama në vitin 2008 dhe e përfunduar vetëm një vit përpara, duke e transformuar këtë zonë në hapësirën publike më të bukur në Europë.

“Para pak ditësh ishim në Barcelonë për të marrë këtë çmim që ju shikoni këtu sot i cili është një çmim që në fakt nuk jepet vetëm nga organizata pritëse e çmimit që është Qendra Kulturore Bashkëkohore e Barcelonës, por në fakt nga 6 institucionet kryesore të arkitekturës edhe të urbanistikës në Europë, nga Fondacioni i Arkitekturës, nga Muzeu i Arkitekturës dhe Disign, nga Muzeu i Arkitekturës Gjermane, nga Qendra e Arkitekturës në Vjenë dhe nga Muzeu i Arkitekturës në Finlandë. Ky rezultat dhe kjo arritje e nisur nga Edi Rama në vitin 2008 dhe e përfunduar vetëm një vit më përpara është zyrtarisht hapësira publike më e bukur në Europë”, tha ai, teksa nënvizoi se qëllimi është që përtej skepticizmit dhe histerisë së momentit të fitohet beteja për gjeneratat e ardhshme.

“Kam disa falënderime sot dhe falënderimet janë së pari për Edi Ramën dhe për skuadrën e tij që 10 vite më përpara pati vizionin për të bërë diçka revolucionare. Sigurisht ne sot jetojmë në kohën e populizmit, gjëja më e thjeshtë të bësh është të zbulosh çfarë duan njerëzit dhe të bësh atë që duan njerëzit. Ky quhet populizëm, të mos i sfidosh njerëzit të ndryshojnë status-quo-në, të mos i inkurajosh të ëndërrojnë diçka më të madhe, më të bukur, t’u vish sipas avazit vetëm për të fituar betejën e ditës. Pyetja është kjo, ne jemi këtu për betejën e ditës apo për betejën e një gjenerate të tërë? Jemi këtu për të fituar disa pikë të vogla dhe për të ulur histerinë e momentit apo jemi këtu për të bërë një betejë me histerinë dhe për të fituar filozofia jonë e qyteteve për njerëzit mbi histerinë e ditës, mbi cinizmin dhe mbi sportin kombëtar të skepticizmit”. Në fund të fjalës së tij, Veliaj dha një lajm të mirë edhe sa i takon Piramidës, e cila shumë shpejt do të kthehet në qendrën më të madhe të zhvillimit të teknologjisë së informacionit në rajonin tonë.

BalkanWeb

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: