Në Konferencën për Inteligjencën Artificiale për vendet në zhvillim, e zhvilluar në selinë e OKB-së në Bangkok, CEO i Acromax, Aldor Nini, prezantoi moderatoren virtuale Akila dhe prototipin e monitorimit të sistemit të drejtësisë me Inteligjencë Artificiale, i quajtur brenda kompanisë “RoboCop”.
Gjatë fjalës së tij, Nini theksoi vizionin e tij për përdorimin e Inteligjencës Artificiale si një mjet për rritjen e transparencës dhe llogaridhënies institucionale. “Inteligjenca Artificiale nuk duhet të zëvendësojë drejtësinë, por ta bëjë atë më transparente. Një host virtual nuk mund të frikësohet, të ndikohet apo të intimidohet, duke garantuar një komunikim të qëndrueshëm dhe të pavarur,” shpjegoi Nini.
Pjesa qendrore e prezantimit ishte modeli i monitorimit të sistemit të drejtësisë, që mundëson analizimin e vendimeve të policisë, prokurorisë dhe gjyqtarëve në kohë reale, duke identifikuar mospërputhje me ligjin dhe procedurat. Sistemi është projektuar të jetë i aksesueshëm jo vetëm për institucionet mbikëqyrëse, por edhe për personat e akuzuar dhe familjet e tyre.
“Çdokush mund të verifikojë nëse procedurat ligjore janë respektuar dhe të identifikojë shkeljet e mundshme brenda sekondave,” nënvizoi Nini.
Prezantimi në OKB vendosi këtë projekt në kontekstin e diskutimeve ndërkombëtare mbi rolin e Inteligjencës Artificiale në forcimin e institucioneve dhe rritjen e besimit publik, veçanërisht në vendet në zhvillim.
