Kryeministri izraelit Benjamin Netanyahu tha të enjten se beson që lufta në Iran mund të përfundojë më shpejt nga sa “beson bota”.

“Unë gjithashtu besoj se kjo luftë do të përfundojë shumë më shpejt nga sa mendojnë njerëzit”, tha Netanyahu në një konferencë për shtyp dje. Kryeministri izraelit pohoi se Irani nuk ka më aftësinë për të pasuruar uranium. “Pas 20 ditësh, mund t’ju them se Irani sot nuk ka aftësi për të pasuruar uranium, as për të ndërtuar raketa balistike”, vuri në dukje ai.

“Ne vazhdojmë t’i shkatërrojmë këto aftësi. Do t’i kthejmë ato në pluhur, në hi”, shpjegoi kryeministri izraelit. Ai shtoi: Irani “është më i dobët se kurrë”, ndërsa Izraeli është një fuqi rajonale “dhe disa do të thoshin një fuqi globale”. Ai deklaroi më tej se “gjatë Operacionit Rising Lion në qershor, ne shkatërruam raketa dhe pjesën më të madhe të infrastrukturës bërthamore. Por ajo që po shkatërrojmë tani janë fabrikat që prodhojnë përbërësit për të ndërtuar ato raketa dhe armët bërthamore që ato po përpiqen të ndërtojnë. Ne po shkatërrojmë bazën e tyre industriale në një mënyrë që nuk e kemi bërë kurrë më parë.”

Në të njëjtën kohë, Netanyahu vuri në dukje se ka “tension të madh” midis zyrtarëve të lartë të regjimit iranian dhe ai nuk është i sigurt se “kush po e sundon Iranin tani”. Netanyahu tha se Izraeli do të vazhdojë të shënjestrojë figura të larta iraniane: “Nuk ka rëndësi se kush i zëvendëson ata – ne po sigurohemi që ndryshimet në Gardën Revolucionare të jenë jetëshkurtra.” Ai përsëriti se Izraeli po punon për të krijuar kushtet që do t’u lejojnë iranianëve të përmbysin regjimin, por se në fund të fundit i takon popullit iranian të përmbysë Republikën Islamike.

“Po, regjimi mund të ndryshojë. A është e sigurt kjo? Jo. Dhe në fund të fundit, i takon popullit iranian të përfitojë nga kushtet që po krijojmë, duke e dobësuar regjimin”, theksoi ai.