Të paktën 10 palestinezë janë vrarë në sulmet ajrore izraelite dhe luftimet midis Hamasit dhe një milicie palestineze të mbështetur nga Izraeli në Gazën qendrore, thonë burimet lokale.
Sulmet thuhet se kishin në shënjestër personelin e sigurisë së Hamasit, i cili ishte përleshur me anëtarë të milicisë në lindje të kampit të refugjatëve në Maghazi
Një zëdhënës i spitalit al-Aqsa në Deir al-Balah tha se trupat e 10 personave nga vendi i ngjarjes ishin sjellë atje. Dhjetëra të tjerë u plagosën dhe disa ishin në gjendje kritike, shtuan ata.
Megjithatë, dëshmitarët thanë se anëtarët e milicisë së mbështetur nga Izraeli ngritën një pikë kontrolli në lindje të Maghazit, ku u sulmuan nga personeli i sigurisë së Hamasit, duke shkaktuar përleshje.Dëshmitarët shtuan se dronët izraelitë ndërhynë për të mbështetur milicinë, duke kryer sulme ndaj personelit të Hamasit në tre lokacione.
Izraeli dhe Hamasi kanë akuzuar njëri-tjetrin për shkelje të përsëritura të armëpushimit për të cilin kishin rënë dakord pothuajse gjashtë muaj më parë. Të paktën 723 palestinezë janë vrarë në Gaza në sulmet izraelite që atëherë, sipas ministrisë së shëndetësisë të territorit të drejtuar nga Hamasi. Ushtria izraelite ka thënë se pesë ushtarë të saj janë vrarë në sulme nga grupet palestineze gjatë së njëjtës periudhë.
Çështja e çarmatimit ka qenë një nga pengesat kryesore për përparimin në fazën e dytë të planit 20-pikësh të paqes të Presidentit të SHBA-së, Donald Trump.
Të dielën, zëdhënësi i krahut ushtarak të Hamasit hodhi poshtë çdo bisedë për çarmatim përpara se Izraeli të përmbushte angazhimet e tij sipas fazës së parë të planit të Trump.
