Një asteroid gjigant, i njohur si 99942 Apophis apo “Zoti i Kaosit”, pritet t’i afrohet Tokës brenda rreth tre vitesh, duke tërhequr vëmendjen e komunitetit shkencor ndërkombëtar.

Sipas vlerësimeve, objekti hapësinor ka përmasa të krahasueshme me rreth tre fusha futbolli dhe do të kalojë në një distancë shumë të afërt sipas standardeve astronomike – madje më afër se disa satelitë artificialë që orbitojnë planetin. Ekspertët theksojnë se ai mund të jetë i dukshëm edhe me sy të lirë në momentin e afrimit maksimal.

NASA e klasifikon këtë asteroid si një objekt “potencialisht të rrezikshëm”, një term që përdoret për trupat qiellorë që kalojnë relativisht pranë Tokës dhe kanë përmasa të konsiderueshme. Megjithatë, shkencëtarët sqarojnë se kjo nuk nënkupton rrezik për përplasje.

Agjencia hapësinore amerikane dhe observatorë të tjerë ndërkombëtarë po e monitorojnë nga afër trajektoren e tij, ndërsa llogaritjet aktuale tregojnë se kalimi i 99942 Apophis do të jetë i sigurt për planetin.

Ngjarja konsiderohet si një mundësi e rrallë për studiuesit për të vëzhguar nga afër një asteroid të madh, si dhe për publikun që mund të ketë mundësinë ta shohë atë pa pajisje të specializuara.