Donald Trump do të vizitojë Malin Rushmore më 3 korrik, shkëmbin e famshëm me fytyrat e gdhendura të katër ish-presidentëve amerikanë, njoftoi sot organizata që mbikëqyr festimet e 250-vjetorit të Deklaratës së Pavarësisë së SHBA-së , e cila u nënshkrua më 4 korrik 1776.

Presidenti amerikan do të mbajë një fjalim atje “nën një nga simbolet më të famshme të vendit të lirisë dhe vetëvendosjes”, tha organizata Freedom 250 në një njoftim për shtyp.

Fjalimi i tij, në prag të festës kombëtare të SHBA-së, pritet të pasohet nga një shfaqje madhështore fishekzjarresh.

Mali Rushmore ndodhet në Dakotën e Jugut (veri). Fytyrat e George Washington, Thomas Jefferson, Abraham Lincoln dhe Theodore Roosevelt janë të gdhendura në shkëmbin e granitit.

Vitin e kaluar, një kongresmene republikane paraqiti një projektligj, i cili në fund nuk u miratua, duke kërkuar që fytyra e Donald Trump të shtohej pranë atyre të katër paraardhësve të tij të shquar.

Sipas menaxherëve të atraksionit, siç raportohet nga shtypi amerikan, kjo do të kishte qenë e pamundur në çdo rast, për shkak të mungesës së sipërfaqes së mjaftueshme.

Vetë udhëheqësi republikan postoi së fundmi një foto në faqen e tij të internetit Truth Social, të krijuar me Inteligjencë Artificiale, ku shfaqet fytyra e tij e gdhendur së bashku me ato të Uashingtonit, Xhefersonit, Lincolnit dhe Ruzveltit.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb