Të paktën pesë palestinezë, mes tyre dy fëmijë, janë vrarë të hënën në sulme izraelite në zona të ndryshme të Rripit të Gazës, sipas autoriteteve lokale dhe shërbimeve të emergjencës.

Sipas Agjencisë së Mbrojtjes Civile të kontrolluar nga Hamasi, një vajzë 10-vjeçare u vra nga bombardimet në veri të Khan Younisit, ndërsa një fëmijë 4-vjeçar humbi jetën në kampin e refugjatëve Al-Bureij, në pjesën qendrore të enklavës.

Në të njëjtën zonë, një grua dhe fëmija i saj u nxorën nga rrënojat pas bombardimeve. Ndërkohë, dy palestinezë të tjerë u vranë gjatë një sulmi në një tendë në një kamp në Deir al-Balah.

Shërbimet e shpëtimit raportuan gjithashtu se një person u vra dhe pesë të tjerë u plagosën në një sulm ajror në Khan Younis.

Sipas raportimeve, avionët izraelitë goditën me tre raketa një impiant shkripëzimi uji në lagjen Sheikh Radwan, në veriperëndim të qytetit të Gazës.

Hamas e dënoi sulmin, duke e cilësuar si një goditje ndaj infrastrukturës jetike për popullsinë civile.

Por ushtria izraelite (IDF) e mohoi se impianti i shkripëzimit ishte objektivi. Një zëdhënës tha se forcat izraelite kishin goditur një depo armësh të Hamasit, të vendosur në një xhami pranë impiantit. Sipas tij, një tjetër depo armësh u godit në Deir al-Balah.

IDF deklaroi gjithashtu se objektet në fjalë përdoreshin nga militantët e Hamasit për të fshehur dhe ruajtur armë dhe se ishin marrë masa paralajmëruese për të reduktuar rrezikun ndaj civilëve.

Sipas Ministrisë së Shëndetësisë në Gaza, të paktën 1,288 palestinezë janë vrarë në operacionet ushtarake izraelite që nga 10 tetori 2025, kur hyri në fuqi armëpushimi në enklavë.