Një moment i pazakontë ka ndodhur gjatë një inspektimi zyrtar në një njësi ushtarake mongole, ku presidenti i Mongolisë, Ukhnaa Khurelsukh, ka habitur ushtarët me forcën e tij fizike.
58-vjeçari, i veshur me kostum, këmishë dhe kravatë, u shtri në një stol palestre dhe mori një shtangë me peshë 100 kilogramë. Ai realizoi plot 20 përsëritje radhazi, ndërsa përreth tij oficerë dhe rekrutë e ndiqnin me vëmendje dhe regjistronin momentin me telefonat celularë.
Pamjet u shpërndanë me shpejtësi në rrjetet sociale dhe u bënë virale brenda pak orësh.
Forca fizike e presidentit nuk është krejtësisht e befasishme. Sipas biografisë së tij, Khurelsukh është marrë me boks dhe peshëngritje që në rini. Ai ka një të kaluar edhe në ushtri, pasi ka shërbyer si oficer në forcat e armatosura, është diplomuar në Universitetin e Mbrojtjes dhe ka arritur gradën e nënkolonelit.
Presidenti mongol njihet gjithashtu për pasionin e tij për motoçikletat. Ai ka themeluar klubin e parë të pronarëve të Harley-Davidson në Mongoli dhe është fotografuar ndër vite duke udhëtuar nëpër stepë me motoçikletë.
Edhe emri i parë i presidentit, “Ukhnaa”, lidhet me një simbol të forcës, pasi përkthehet si “Sëpatë bronzi” në gjuhën mongole.
Sipas raportimeve, performanca me shtangën ndodhi spontanisht gjatë vizitës së tij në bazën ushtarake, ndërsa presidenti po inspektonte ambientet e stërvitjes së rekrutëve. 20 përsëritje me 100 kilogramë konsiderohen një rezultat mjaft i vështirë edhe për persona që stërviten rregullisht, veçanërisht në moshën 58-vjeçare.
🇲🇳 Mongolia’s President Ukhnaagiin Khürelsükh bench-pressed 100 kg for 20 reps while visiting a military unit
https://t.co/3GcPx5loe5— Visegrád 24 (@visegrad24) September 10, 2026
