Protestat kundër qeverisë së kryeministrit Edi Rama në Tiranë kanë tërhequr vëmendjen e mediave ndërkombëtare.
Gazeta amerikane “The Washington Post”, në një artikull të publikuar më 20 tetor, ka raportuar mbi përplasjet mes protestuesve dhe policisë, si dhe pakënaqësinë në rritje ndaj qeverisë shqiptare.
The Washington Post, shkruan se deputetët e opozitës në Shqipëri kanë ndërprerë seancën parlamentare duke ndezur flakadanë, në një tjetër zhvillim që vjen pas disa javësh protestash kundër qeverisë.
Sipas raportimeve, tensionet politike në vend janë shtuar në një kohë kur qytetarët kanë shprehur pakënaqësi për çështje të ndryshme ekonomike dhe sociale.
Shqipëria, ashtu si disa vende të tjera evropiane, është përballur me protesta të nxitura nga shqetësimet për çmimet e karburanteve, gjendjen e shkollave, cilësinë e shërbimeve publike dhe kostot e strehimit.
Këto çështje janë kthyer në pjesë të debatit publik, ndërsa protestat kundër qeverisë vijojnë të shoqërohen me kërkesa për ndryshime politike dhe përmirësimin e kushteve të jetesës.
Ndezja e flakadanëve nga deputetët opozitarë në Kuvend shënon një tjetër episod të tensioneve mes opozitës dhe mazhorancës, në një klimë të karakterizuar nga përplasjet politike dhe pakënaqësia qytetare.
Sipas raportimit, protestat kanë vijuar, ndërsa situata është tensionuar me përballjet mes demonstruesve dhe forcave të rendit.
Artikulli thekson se pakënaqësia nuk lidhet vetëm me kundërshtimin ndaj një projekti turistik luksoz në Shqipëri, por është shtrirë edhe te shqetësimet për korrupsionin, arsimin, ekonominë dhe mënyrën se si qeveriset vendi.
Nga ana tjetër, Rama i ka cilësuar zhvillimet si përpjekje për të destabilizuar qeverinë, duke argumentuar se dhuna nuk mund të justifikohet si formë proteste.
Sipas “The Washington Post”, pakënaqësia e qytetarëve lidhet gjithashtu me vështirësitë ekonomike, cilësinë e shërbimeve publike dhe shqetësimet për të ardhmen, veçanërisht mes të rinjve.
Raportimi i medias amerikane e paraqet situatën si një sfidë të rëndësishme politike për qeverinë shqiptare, ndërsa tensionet në rrugët e Tiranës kanë nxitur vëmendje edhe jashtë vendit.
