KAS vendos sot për kërkesat nga PD dhe LSI për zgjedhjet e 25 prillit në qarkun e Gjirokastrës.
Të dyja partitë kanë kërkuar shpalljen e pavlefshme të zgjedhjeve dhe ripërsëritjen e tyre.
Akuzat më të forta janë për votim të dyfishtë, por këtë e mohon në seancë përfaqësuesi i PS, Eridian Salianji i cili thotë se ka zero shanse të ketë ndodhur, ndërsa për defektet teknike thotë se duhet të përgjigjen personat përgjegjës.
Ivi Kaso i PD nga ana tjetër thekson se provat tashmë janë të qarta dhe i mbetet në dorë KAS të vendosë nëse paligjshmëria shkakton pavlefshmëri dhe a duhet përsëritur procesi ose jo.
Edhe anëtari i KAS, Ledio Braho ka kërkuar nga KQZ të fillojë procedimin nëse nuk e ka nisur ende për votimin e dyfishtë, për komisionerët dhe administratën zgjedhore.
DEBATI NË KAS
Eridian Salianji (PS): Unë ua them me bindje të plotë, zero mundësi për persona që kanë votuar dy herë. Për arsye se të gjithë personat që kanë votuar kanë hedhur nënshkrimet, kanë edhe kartat e identitetit në QV-të. Defektet teknike të vijnë ti sqarojnë operatorët dhe personat përgjegjës.
Avokati i LSI: Ne e gjejmë shumë të qartë këtë tabelë, është sqaruar me hollësi që kanë qenë raste 73. 12 shenja gishtash kanë përdorur tentativa ose votim për 70 persona. Po ashtu është një listë emërore, rezulton të jetë vetëm inicialet e personit, datëlindja, nr. I votimit, dhe qarkut përkatës. Është shumë e qartë kjo gjë.
Ivi Kaso (PD): Provat janë eksplicite dhe flasin qartë për paligjshmëri të ndodhur, në një masë të caktuar, në gjithë zonën zgjedhore, dhe lista që i bashkëngjitet kërkesës sonë është po ashtu po aq e qartë. Për aq sa i duhet këtij hetimi besoj që të dhënat janë të qarta, ajo çka i mbetet këtij Komisioni të vlerësojë, është nëse kjo paligjshmëri është e tillë që të shkaktojë pavlefshmëri. Ndikon në ndarjen e mandateve. Duhet të përsëritet procesi në të gjithë zonën zgjedhore apo jo.
Ledio Braho (KAS): I kërkoj administratës së KQZ që të zbatojë detyrën të paktën për rastet e komisionerëve apo administratës zgjedhore që është konstatuar në kushtet e votimit të dyfishtë. Në dijeninë time jemi në kushtet e një vepre penale të konsumuar nga këta komisionerë. Administrata e KQZ-së duhet të procedojë nëse nuk ka proceduar ende.
(BalkanWeb)
