Presidentja e Komisionit Evropian, Ursula von der Leyen, propozoi lëvrimin e një shume shtesë prej 100 milionë eurosh për të mbështetur fermerët e Evropës Lindore, të cilët janë më të prekur nga rënia e çmimit të drithërave për shkak të luftës në Ukrainë.
“Tani po përgatitemi të paraqesim një paketë të dytë të mbështetjes financiare prej 100 milionë euro (…) si pjesë e një qasjeje të përbashkët evropiane,” tha Von der Leyen në një letër drejtuar udhëheqësve të pesë anëtarëve më të prekur (Poloni, Hungari, Rumania, Sllovakia, Bullgaria).
Më herët, një përfaqësues i Komisionit tha se Brukseli do të marrë “masa paraprake”, siç i cilësoi ai, për disa kategori drithërash dhe vajrash, veçanërisht për grurin, misrin, luledielli dhe kanola.
Bazuar në rregullat e BE-së, Bashkimi mund të kufizojë importin e produkteve për disa ose të gjithë anëtarët e tij, por të lejojë transitin e tyre. Komisioneri i Tregtisë Valdis Dombrovskis do të diskutojë planet më vonë sot me ministrat nga pesë vendet, si dhe homologët e tyre ukrainas.
Muajin e kaluar BE miratoi një paketë të parë prej 56.3 milionë euro për të mbështetur fermerët e këtyre vendeve, kujtoi Ursula von der Leyen.
Pas pushtimit të Ukrainës nga Rusia, BE-ja pezulloi lidhjet doganore për një vit për të gjitha mallrat e importuara nga Ukraina dhe u zhvendos për të ndihmuar Kievin të eksportonte rezervat e tij të drithit pasi rruga e tranzitit në Detin e Zi u mbyll. Por në vend që mallrat të kalonin tranzit, vendet fqinje të Ukrainës panë grurë, fara luledielli dhe misër nga Ukraina të grumbulloheshin në tokën e tyre, gjë që çoi në një rënie të çmimit të produkteve vendase. Ky fakt ka bërë që disa vende, si Polonia, Hungaria, Sllovakia dhe tani Bullgaria, të ndalojnë importet e grurit ukrainas për të mbrojtur sektorin e tyre bujqësor.
