Ushtria ruse është përballur me humbje të mëdha që nga nisja e agresionit në Ukrainë. Një zyrtar ukrainas bën me dije se humbjet ruse kanë qenë aq të mëdha, saqë janë detyruar të përdorin një fabrikë e cila para se të niste lufta shërbente për të paketuar mish. Tashmë kjo fabrikë po përdoret si morg.
Në një deklaratë për shtyp, divizioni i inteligjencës i Ministrisë së Mbrojtjes ukrainase tha se ushtrisë së Putinit i ka mbetur pa hapësirë për të ruajtur numrin në rritje të trupave të vdekur.
Zyrtarët thanë se rusët po kërkonin “frigoriferë shtesë” për të ruajtur trupat në qytetin e pushtuar të Melitopol, në juglindje të kryeqytetit Kiev.
“Administrata pushtuese e Melitopolit po kërkon urgjentisht ngrirës dhe frigoriferë industrialë shtesë. Dihet se fabrika e ambalazhimit të mishit të qytetit, e cila u shndërrua në morg, tashmë është plotësisht e mbushur me trupat e pushtuesve të vrarë dhe nuk mund të pranojë më. Ushtria ruse filloi konvertimin e fabrikës së paketimit të mishit në një morg të improvizuar të hënën”, thuhet në deklaratë.
Pronarët e fabrikës thuhet se u urdhëruan t’ia dorëzonin ndërtesën pa pagesë rusëve. Trupat e vendosura atje humbën jetën në përleshjet pranë qyteteve të Polohy dhe Huliaipole në rajonin e Zaporizhzhia.
“Këto ngjarje janë të lidhura me humbje të rënda të pushtuesve në fuqi punëtore. Përveç kësaj, ruajtja afatgjatë e trupave të të vrarëve është për shkak të synimeve të udhëheqjes ruse për të fshehur shkallën reale të humbjeve nga elektorati rus”, tha Ministria e Mbrojtjes e Ukrainës në njoftimin për shtyp.
Zyrtarët rusë nuk janë përgjigjur publikisht ndaj pretendimeve.
Forcat ruse pushtuan Melitopolin në shkurt gjatë javës së parë të pushtimit të Ukrainës.
Në mars, forcat ushtarake ruse vendosën një kryebashkiak të ri në Melitopol pasi kryetari i zgjedhur i tij u rrëmbye nga një grup prej 10 ushtarësh rusë.
(BalkanWeb)
