Lazio është në luftë me dy skuadra të tjera, Romën dhe Interin, për të siguruar një vend në “Champions League” për sezonin e ardhshëm, por ndërkohë drejtori sportiv Igli Tare po punon për të gjetur zëvendësuesin e De Vrij, lojtarit që në fund të sezonit i përfundon kontrata.
Së fundi në objektiv të Tares ka përfunduar mbrojtësi uruguaian i Atleticos së Madridit, Diego Godin. 32-vjeçari është një nga pikat më të forta të formacionit të Simeones, por kontrata e tij është në skadencë dhe klubi madrilen nuk ka ndërmend t’i ofrojë rinovimin, pasi mosha e tij nuk premton për më gjatë.
Nga ana tjetër, edhe vetë Godin do ta mirëpriste një transferim në Itali, pasi te Lazio do të mund të siguronte një kontratë 3-vjeçare, para se të mendonte për t’i dhënë lamtumirën futbollit.
Kujtojmë se për De Vrij është folur në mediat italiane se ka arritur një marrëveshje me Interin.
(BalkanWeb)