Zak Topuzi, kryetar i sektorit të hoteleve deklaroi mbrëmjen e sotme në emisionin ‘Real Story’ në ‘News24’ se nevojitet një paketë e tretë për baret dhe restorantet, të cilët janë goditur dhe do të goditen nga pandemia e koronavirusit.
Ai theksoi se këto biznese janë shumë të prekura edhe për shkak të faktit se shumë prej tyre kanë qira jashtëzakonisht të shtrenjta, ndërsa shtoi se ky sektor duhet të përfitojë uljen e TVSH-së. Po ashtu Topuzi tha se është e nevojshme që për sektorin e turizmit të lëvrohet kredia, në mënyrë që ata të përgatiten për sezonin e hapjes në qershor, sipas kushteve të vendosura nga qeveria, duke marrë shkas nga situata.
“Kjo është njësoj si lufta. Kemi shkuar në luftë, dhe është e pamundur që të rezistojë pa të vdekur, pa të falimentuar. Ndaj bota, rekomandon disa masa për ekonomë, që është motor i përgjithshëm. Ndaj duhet të implementohet urgjent një paketë. Jemi në momentet ku fillimi i qershorit të jetë fillimi i turizmit. Duhet të bësh kuzhina ndihmëse, të modifikosh baret. Ndaj është me rëndësi që kjo kredi të lëvrohet shpejt. Në këtë sektor është me rëndësi pjesa e bareve restoranteve. Ne jemi pjesë e Shoqatës Ballkanike të Hoteleve dhe Restoranteve e bareve, ku Shqipëria zë vendin e parë në 10 vite. Jemi në vendet e para të restoranteve dhe ia marrin dhe Greqisë. Jemi në vend të dytë për baret, pasi vendin e parë e zë Greqia. Ky është sektor i goditur. Në paketa e tretë duhet të përfshirë dhe baret dhe restorantet. Janë goditur dhe do goditen nga kjo pandemi, nga distancomi. Kanë ambiente me qira jashtëzakonisht të shtrenjta. Duhet të përfitojë ky sektor për uljen e TVSH-ve.”, pohoi ai.
(BalkanWeb)
